હરિયાણાના ફરીદાબાદમાં એક વ્યક્તિએ ચાર બાળકો સાથે ટ્રેન આગળ કૂદીને આત્મહત્યા કરી. આત્મહત્યા કરતા પહેલા, તેણે બાળકોને ઠંડા પીણા અને ચિપ્સ પણ આપ્યા. જ્યારે ટ્રેન આવી, ત્યારે બાળકોએ પણ ભાગવાનો પ્રયાસ કર્યો પરંતુ તે વ્યક્તિએ તેમને પોતાના હાથમાં પકડી રાખ્યા અને એકસાથે ટ્રેન આગળ કૂદી પડ્યા. આ ઘટના બાદ સમગ્ર વિસ્તારમાં સનસનાટી ફેલાઈ ગઈ.
ખરેખર, આખો મામલો બલ્લભગઢ વિસ્તારનો હોવાનું કહેવાય છે. બિહારના રહેવાસી ૪૫ વર્ષીય મનોજ મહતોનો તેની પત્ની પ્રિયા સાથે કોઈ વાતને લઈને ઝઘડો થઈ રહ્યો હતો. મંગળવારે સવારે બંને વચ્ચે ઝઘડો થયો, જેના પછી મહતોએ કહ્યું કે તે બાળકોને પાર્કમાં લઈ જઈ રહ્યો છે અને ઘરેથી નીકળી ગયો.
પોલીસે જણાવ્યું કે મહતો સ્ટેશનથી લગભગ એક કિલોમીટર પહેલા રેલ્વે ટ્રેક પર ચાલતો જાવા મળ્યો હતો. તે બે બાળકોને ખભા પર લઈને બે બાળકોના હાથ પકડી રહ્યો હતો. લોકો પાઇલટે દૂરથી ઘણી વાર હોર્ન વગાડ્યો, પરંતુ મહતો પાટા પરથી ખસ્યો નહીં. જ્યારે બાળકો દોડવા લાગ્યા, ત્યારે તેણે તેમને પોતાના હાથમાં પકડી લીધા. ટ્રેન નજીક આવતાની સાથે જ તે તેના ચાર બાળકો પવન (૧૦), કારુ (૯), મુરલી (૫) અને છોટુ (૩) સાથે ટ્રેનની સામે કૂદી પડ્યો. આ ઘટના બપોરે લગભગ ૧૨ઃ૫૫ વાગ્યે બની હતી. માહિતી મળ્યા બાદ, પોલીસ ટીમ ઘટનાસ્થળે પહોંચી અને મૃતદેહોને પાટા પરથી હટાવીને પોસ્ટમોર્ટમ માટે મોકલી આપવામાં આવ્યા.
આ ઘટનાએ પંચકુલામાં બનેલી તાજેતરની ઘટનાની યાદો તાજી કરી દીધી. તાજેતરમાં જ પંચકુલામાં એક જ પરિવારના ૭ સભ્યોએ સામૂહિક આત્મહત્યા કરી હતી. મૃતકોમાં પ્રવીણ મિત્તલ, તેમની પત્ની રીના, તેમના ત્રણ બાળકો અને પ્રવીણના માતા-પિતાનો સમાવેશ થાય છે. પ્રાથમિક તપાસ મુજબ, પરિવારે ઝેર પીને આત્મહત્યા કરી હતી. ઘટનાસ્થળેથી બે સુસાઇડ નોટ પણ મળી આવી હતી, જેમાં પ્રવીણ મિત્તલે આત્મહત્યાનું કારણ દેવું અને આર્થિક સંકડામણ ગણાવી હતી. પરિવાર મૂળ હિસારના બરવાળાનો રહેવાસી હતો, પરંતુ છેલ્લા ૧૨ વર્ષથી પંચકુલામાં રહેતો હતો.
