ઘણીવાર સામે આવ્યા છે કે પાકિસ્તાન નાદારીની આરે છે. પરંતુ હવે, પુરાવા બહાર આવ્યા છે કે પાકિસ્તાન ભયંકર સંકટમાં છે. પરિસ્થિતિ એવી છે કે કર્મચારીઓને તેમના પગાર પણ મળી રહ્યા નથી. આનું કારણ એ છે કે પાકિસ્તાન ઇન્ટરનેશનલ એરલાઇન્સ ગંભીર સંકટનો સામનો કરી રહી છે. એરક્રાફ્ટ એન્જીનિયરોએ ફ્લાઇટ્સ માટે ક્લીયરન્સ આપવાનું બંધ કરી દીધું છે. આ મંજૂરીના અભાવે, દેશભરમાં એરલાઇન્સની ફ્લાઇટ્સ સંપૂર્ણપણે બંધ થઈ ગઈ છે.પાકિસ્તાન ઇન્ટરનેશનલ એરલાઇન્સના એન્જીનિયરોના પગારમાં વધારો કરવામાં આવ્યો નથી, કે તેમને સલામતીની ખાતરી આપવામાં આવી નથી. આ કારણે, ગુસ્સે ભરાયેલા ઇજનેરોએ સોમવાર સાંજથી આંતરરાષ્ટ્રીય ફ્લાઇટ્સ બંધ કરી દીધી છે. એન્જીનિયરોની હડતાળથી આશરે ૧૨ ફ્લાઇટ્સ પ્રભાવિત થઈ છે. સેંકડો મુસાફરો ઇસ્લામાબાદ, કરાચી અને લાહોર જેવા એરપોર્ટ પર ફસાયેલા છે.સોસાયટી ઓફ એરક્રાફ્ટ એન્જીનિયર્સ ઓફ પાકિસ્તાને જણાવ્યું છે કે જ્યાં સુધી એરલાઇનના સીઇઓ પોતાનું વલણ નહીં બદલે ત્યાં સુધી તેના સભ્યો કામ પર પાછા ફરશે નહીં. યુનિયનનો આરોપ છે કે મેનેજમેન્ટ છેલ્લા બે મહિનાથી તેમની ફરિયાદોને અવગણી રહ્યું છે. એન્જીનિયરો કહે છે કે તેમને આઠ વર્ષમાં પગાર વધારો મળ્યો નથી અને હવે સ્પેરપાર્ટ્સની તીવ્ર અછત હોવા છતાં ફ્લાઇટ્સ ક્લીયર કરવા માટે દબાણ કરવામાં આવી રહ્યું છે. યુનિયને કહ્યું, “અમે મેનેજમેન્ટના આદેશોનું પાલન કરીને મુસાફરોના જીવ જાખમમાં મૂકી શકીએ નહીં.”પાકિસ્તાન ઇન્ટરનેશનલ એરલાઇન્સના સીઇઓએ હડતાળને ગેરકાયદેસર જાહેર કરી છે. એરલાઈને જણાવ્યું હતું કે પાકિસ્તાન આવશ્યક સેવાઓ અધિનિયમ ૧૯૫૨ હેઠળ તે ગેરકાયદેસર છે. સીઈઓ કહે છે કે આ હડતાલનો હેતુ એરલાઈનની ચાલી રહેલી ખાનગીકરણ પ્રક્રિયાને તોડફોડ કરવાનો છે. દરમિયાન, એરલાઈન મેનેજમેન્ટ કહે છે કે ફ્લાઇટ કામગીરી ફરી શરૂ થાય તે માટે સ્ટાફની વ્યવસ્થા કરવાના પ્રયાસો ચાલી રહ્યા છે. હાલમાં, પરિસ્થિતિમાં સુધારો થઈ રહ્યો નથી અને આગામી દિવસોમાં તે વધુ ખરાબ થઈ શકે છે.
