એશિયા કપ ૨૦૨૫ પહેલા, પાકિસ્તાન ક્રિકેટ સંબંધિત એક મોટા સમાચાર બહાર આવ્યા છે. ટીમના સ્ટાર બેટ્સમેન આસિફ અલીએ આંતરરાષ્ટ્રીય ક્રિકેટમાંથી નિવૃત્તિ લઈ લીધી છે. આસિફે પાકિસ્તાન માટે ૨૧ વનડે અને ૫૮ ટી૨૦ આંતરરાષ્ટ્રીય મેચ રમી હતી. તેણે પોતાની આંતરરાષ્ટ્રીય કારકિર્દી દરમિયાન મોટાભાગે મિડલ ઓર્ડરમાં બેટિંગ કરી હતી. તે નીચલા ક્રમમાં બેટિંગ કરતો હતો અને ત્યાં ફિનિશરની ભૂમિકા ભજવતો હતો. આસિફે સોશિયલ મીડિયા પોસ્ટ દ્વારા પોતાની નિવૃત્તિની માહિતી આપી હતી.
૧ સપ્ટેમ્બરના રોજ, ૩૩ વર્ષીય આસિફ અલીએ પોતાના સોશિયલ મીડિયા પર પોસ્ટ કરીને આંતરરાષ્ટ્રીય ક્રિકેટમાંથી નિવૃત્તિની જાહેરાત કરી. તેમણે લખ્યું કે આજે હું આંતરરાષ્ટ્રીય ક્રિકેટને અલવિદા કહું છું. પાકિસ્તાનની જર્સી પહેરવી એ મારા જીવનનો સૌથી મોટો સન્માન રહ્યો છે અને ક્રિકેટના મેદાન પર મારા દેશની સેવા કરવી એ મારા માટે સૌથી ગર્વની ક્ષણ રહી છે. આ પ્રસંગે તેમણે પોતાના સાથી ખેલાડીઓ, કોચિંગ સ્ટાફ અને ચાહકોનો પણ આભાર માન્યો.
આ સાથે, આસિફે એમ પણ કહ્યું છે કે તે વિશ્વભરમાં સ્થાનિક ક્રિકેટ અને ફ્રેન્ચાઇઝ લીગમાં રમવાનું ચાલુ રાખશે. તે લાંબા સમયથી પાકિસ્તાનની ટી ૨૦ ટીમનો મહત્વપૂર્ણ ભાગ હતો. ૨૦૧૮માં ઈસ્લામાબાદ યુનાઈટેડને પાકિસ્તાન સુપર લીગ (પીએસએલ)નો ખિતાબ જીતવામાં તેમણે મહત્વપૂર્ણ ભૂમિકા ભજવી હતી. આસિફે ૨૦૧૮માં વેસ્ટ ઈન્ડીઝ સામે પોતાની પહેલી ટી૨૦ આંતરરાષ્ટ્રીય મેચ રમી હતી અને બે મહિના પછી તેમને વનડે ક્રિકેટમાં પણ ડેબ્યૂ કરવાની તક મળી હતી.
આસિફ અલી ૨૦૧૮ થી ૨૦૨૩ સુધી પાકિસ્તાન ટીમનો ભાગ હતો, પરંતુ તે ત્યાં સાતત્ય સાથે રન બનાવી શક્્યો ન હતો. તેણે ઓક્ટોબર ૨૦૨૩માં બાંગ્લાદેશ સામે પોતાની છેલ્લી ટી૨૦ મેચ રમી હતી. તેણે એપ્રિલ ૨૦૨૨માં ઓસ્ટ્રેલિયા સામે પોતાની છેલ્લી વનડે રમી હતી. આસિફે ૨૧ વનડેમાં ૨૫.૪૬ ની સરેરાશથી ૩૮૨ રન બનાવ્યા હતા, જેમાં ત્રણ અડધી સદીનો સમાવેશ થાય છે. તે જ સમયે, ૫૮ ટી૨૦ આંતરરાષ્ટ્રીય મેચોમાં તેમણે ૧૫.૧૮ ની સરેરાશ અને ૧૩૩.૮૭ ના સ્ટ્રાઈક રેટથી ૫૭૭ રન બનાવ્યા હતા, જેનો શ્રેષ્ઠ સ્કોર ૪૧* હતો. તે પોતાના આંતરરાષ્ટ્રીય કારકિર્દીમાં એક પણ સદી બનાવી શક્યો ન હતો.
