જમ્મુ અને કાશ્મીરના પહેલગામમાં થયેલા આતંકવાદી હુમલા બાદ, ભારત સરકારે પાકિસ્તાનથી આવતા તમામ લોકોના વિઝા રદ કરીને તેમને પાછા મોકલવાના નિર્દેશો જારી કર્યા છે. દરમિયાન, પાકિસ્તાનના સિંધ પ્રાંતમાં ત્રાસ સહન કરીને ભારત પહોંચેલા હિન્દુ શરણાર્થીઓએ છત્તીસગઢ સરકારને રાજ્યમાં કાયમી રહેવાની મંજૂરી આપવા અપીલ કરી છે. ૨૦ એપ્રિલે સરહદ પાર કરીને ભારત આવેલા આ શરણાર્થીઓએ શનિવારે રાયપુરમાં છત્તીસગઢના ગૃહમંત્રી વિજય શર્માને મળ્યા હતા. હાલમાં, તે બધાએ રાયપુરના શાદાની દરબારમાં આશરો લીધો છે. આ શરણાર્થી પરિવારોએ વાત કરતી વખતે પોતાની દુર્દશા શેર કરી.
સિંધથી આવેલા રવિ કુમારે કહ્યું, “અમે પાકિસ્તાન છોડીને કાયમ માટે અહીં આવી ગયા છીએ. ત્યાં અમારા પર ડાકુઓએ હુમલો કર્યો, અમારા પર ગોળીબાર કરવામાં આવ્યો. અમારી પાસે ન તો સ્વતંત્રતા હતી, ન તો અમે વ્યવસાય કરી શક્યા. મજબૂરીને કારણે અમે બધું પાછળ છોડીને ભારત આવ્યા છીએ. હવે પાકિસ્તાન પાછા જવાનો કોઈ પ્રશ્ન જ નથી.”
છત્તીસગઢ સરકારનો આભાર વ્યક્ત કરતાં તેમણે કહ્યું કે જો સરકાર તેમને અહીં રહેવાની પરવાનગી આપે તો તેઓ અહીં પોતાના પરિવારનું ભવિષ્ય સુરક્ષિત કરવા માંગે છે. જમ્મુમાં થયેલા આતંકવાદી હુમલા પર પ્રતિક્રિયા આપતા રવિ કુમારે કહ્યું, “આતંકવાદીઓ ન તો હિન્દુઓના મિત્ર છે કે ન તો મુસ્લીમોના. જે નિર્દોષ લોકોને મારે છે તે માણસ નથી પણ જુલમી છે.”
સિંધના ઘોટકી જિલ્લાથી આવેલા સહદેવ કુમારે કહ્યું, “અમે હિન્દુ છીએ અને ભારત સિવાય ક્યાંય જઈ શકતા નથી. જો અમને અહીંથી કાઢી મૂકવામાં આવશે, તો અમે ક્યાં જઈશું? ભાગલા સમયે, કેટલાક લોકો ત્યાં ગયા હતા, કેટલાક અહીં રહ્યા હતા. હવે અમે પાછા ફરવા માટે નહીં, પરંતુ અહીં કાયમ માટે સ્થાયી થવા માટે આવ્યા છીએ.”
તેમણે કહ્યું કે ડેપ્યુટી સીએમ વિજય શર્માએ તેમને ખાતરી આપી છે કે જો તેઓ કાગળકામ પૂર્ણ કરશે તો કોઈને પણ પાછા મોકલવામાં આવશે નહીં. તેમજ, પોલીસ અધિક્ષકને શરણાર્થીઓના દસ્તાવેજા શક્્ય તેટલી વહેલી તકે પૂર્ણ કરવા સૂચના આપવામાં આવી છે.
સહદેવ કુમાર ભાવુક થઈ ગયા અને કહ્યું, “જો અમને પાકિસ્તાન મોકલવામાં આવશે, તો તે અમારા મૃત્યુ સમાન હશે. અમે અમારી માતૃભૂમિ હિન્દુસ્તાનમાં રહેવાનો અધિકાર ઇચ્છીએ છીએ. અમે અમારા ગુરુજીમાં શરણ લીધું છે અને અહીં રહેવા માંગીએ છીએ અને અમારા બાળકોનું ભવિષ્ય બનાવવા માટે સખત મહેનત કરવા માંગીએ છીએ.”
સૂત્રોના જણાવ્યા અનુસાર, છત્તીસગઢ સરકાર શરણાર્થીઓની વિનંતી પર સહાનુભૂતિપૂર્વક વિચાર કરી રહી છે. ગૃહમંત્રી વિજય શર્માએ ખાતરી આપી છે કે આ હિન્દુ શરણાર્થીઓને માનવતાના ધોરણે રાહત આપવામાં આવશે અને કાગળની કાર્યવાહી પછી, તેમના રહેણાંકની વ્યવસ્થા સુનિશ્ચિત કરવામાં આવશે.
