રાષ્ટ્રીય તપાસ એજન્સી(એનઆઇએ) એ ડિસેમ્બર ૨૦૨૪ માં પંજાબના એબીએસનગર જિલ્લામાં પોલીસ ચોકી પર થયેલા ગ્રેનેડ હુમલાના ત્રણ આરોપીઓ સામે ચાર્જશીટ દાખલ કરી હતી. તપાસમાં જાણવા મળ્યું છે કે આ હુમલો પ્રતિબંધિત આતંકવાદી સંગઠન ખાલિસ્તાન ઝિંદાબાદ ફોર્સ દ્વારા એક મોટા કાવતરાનો ભાગ હતો, જેનો હેતુ રાજ્યમાં આતંક અને અસ્થિરતા ફેલાવવાનો હતો. એનઆઇએ દ્વારા મોહાલીની ખાસ એનઆઇએ કોર્ટમાં દાખલ કરાયેલ ચાર્જશીટમાં, યુગપ્રીત સિંહ ઉર્ફે યુવી નિહાંગ, જસકરણ સિંહ ઉર્ફે શાહ અને હરજાત સિંહ ઉર્ફે જાત હુંડલને આરોપી તરીકે નામ આપવામાં આવ્યું છે. ત્રણેય સામે ગેરકાયદેસર પ્રવૃત્તિઓ (નિવારણ) અધિનિયમ, વિસ્ફોટકો અધિનિયમ અને ભારતીય દંડ સંહિતાની વિવિધ કલમો હેઠળ ગંભીર આરોપો મૂકવામાં આવ્યા છે. એનઆઇએ અનુસાર, આ આતંકવાદી હુમલાના આયોજન અને અમલમાં વિદેશથી કાર્યરત આતંકવાદી નેટવર્કની સ્પષ્ટ ભૂમિકા સામે આવી છે.
એજન્સીની પ્રાથમિક તપાસમાં એ પણ બહાર આવ્યું છે કે યુકે સ્થિત દ્ભઢહ્લ આતંકવાદી જગજીત સિંહ લાહિરી ઉર્ફે જગ્ગા, જેને જગ્ગા મિયાપુર અને હરિ સિંહ તરીકે પણ ઓળખવામાં આવે છે, તેણે યુગપ્રીત સિંહની ભરતી કરી હતી. જગ્ગાએ તેને એન્ક્રિપ્ટેડ મેસેજિંગ એપ્લીકેશન દ્વારા કટ્ટરપંથી બનાવ્યો હતો અને સીધી સૂચનાઓ આપી હતી. સત્તાવાર નિવેદન મુજબ, યુગપ્રીત સિંહને કેનેડા સ્થિત કેટલીક શંકાસ્પદ સંસ્થાઓ દ્વારા ૪.૩૬ લાખ રૂપિયાનું આતંકવાદી ભંડોળ આપવામાં આવ્યું હતું, જેની ઓળખ થઈ ગઈ છે અને તપાસ ચાલી રહી છે. ભંડોળ દ્વારા હથિયારો, ગ્રેનેડ અને અન્ય સંસાધનો પૂરા પાડવામાં આવ્યા હતા. નવેમ્બર ૨૦૨૪ માં, ત્રણ આરોપીઓને વિદેશી માસ્ટર દ્વારા ગ્રેનેડ સોંપવામાં આવ્યા હતા.
આ હુમલો ૧-૨ ડિસેમ્બર, ૨૦૨૪ ની રાત્રે એસબીએસનગર જિલ્લાના આસોન પોલીસ ચોકી પર થયો હતો, જ્યાં ગ્રેનેડ ફેંકવાની ઘટનાએ રાજ્ય સુરક્ષા એજન્સીઓને ચેતવણી આપી હતી. જોકે આ હુમલામાં કોઈ જાનહાનિ થઈ ન હતી, પરંતુ તેને રાજ્યમાં આતંક ફેલાવવાના કાવતરા તરીકે જોવામાં આવ્યું હતું.
એનઆઇએ અનુસાર, આ હુમલાનો હેતુ પંજાબમાં કાયદો અને વ્યવસ્થાને પડકારવાનો, સંવેદનશીલ સ્થળો પર હુમલો કરવાનો અને લક્ષિત હત્યા કરવાનો હતો. તપાસ એજન્સીએ સ્પષ્ટતા કરી કે આ કેસ માત્ર હુમલો નથી પરંતુ ખાલિસ્તાની આતંકવાદીઓનું સંગઠિત આંતરરાષ્ટ્રીય કાવતરું છે.
એનઆઇએએ કહ્યું કે તે આ કેસમાં વધુ તપાસ ચાલુ રાખી રહી છે અને અન્ય વિદેશી ઓપરેટરોની ભૂમિકાની પણ ઊંડાણપૂર્વક તપાસ કરવામાં આવી રહી છે. એજન્સીનો ઉદ્દેશ્ય આ નેટવર્કના મૂળ સુધી પહોંચવાનો અને ભારત વિરોધી દળોના મનસુબાઓને નિષ્ફળ બનાવવાનો છે.
