સુપ્રીમ કોર્ટે ૩ ઓગસ્ટ, ૨૦૨૫ ના રોજ નીટ પીજી (અનુસ્નાતક) પરીક્ષા યોજવાની મંજૂરી આપી છે. કોર્ટે નેશનલ બોર્ડ ઓફ એક્ઝામિનેશન્સ (એનબીઇ) ને આપેલી અગાઉની સમયમર્યાદા લંબાવી છે. આ પરીક્ષા અગાઉ આ વર્ષે ૧૫ જૂને યોજાવાની હતી. જસ્ટીસ પ્રશાંત કુમાર મિશ્રા અને ઓગસ્ટીન જ્યોર્જ મસીહની બેન્ચે સ્પષ્ટ કર્યું હતું કે આ સંદર્ભમાં એનબીઈ ને હવે કોઈ સમયમર્યાદા આપવામાં આવશે નહીં.
૩૦ મેના રોજ, સુપ્રીમ કોર્ટે આદેશ આપ્યો હતો કે નીટ પીજી પરીક્ષા ફક્ત એક જ શિફ્ટમાં લેવામાં આવે. આ પછી, બીએનઈએ સુપ્રીમ કોર્ટમાં અરજી દાખલ કરી હતી જેમાં પરીક્ષાને પછીની તારીખે ફરીથી શેડ્યૂલ કરવા માટે સમય વધારવાની માંગ કરવામાં આવી હતી, કારણ કે સિંગલ-શિફ્ટ આદેશનું પાલન કરવા માટે નવી વ્યવસ્થા કરવી પડશે.
બીએનઈએ નવી તારીખ (૩ ઓગસ્ટ) ના રોજ એક જ શિફ્ટમાં પરીક્ષા યોજવા માટે મંજૂરી માટે કોર્ટનો સંપર્ક કર્યો હતો. જેને હવે મંજૂરી આપવામાં આવી છે. સુપ્રીમ કોર્ટે પહેલાથી જ નિર્દેશ આપ્યો હતો કે પરીક્ષા દેશભરમાં એક જ શિફ્ટમાં લેવામાં આવે જેથી ન્યાયીતા અને પારદર્શિતા જળવાઈ રહે. યુનાઇટેડ ડોક્ટર્સ ફ્રન્ટ દ્વારા બે શિફ્ટમાં પરીક્ષા લેવાના નિર્ણયને પડકારતી અરજી બાદ આ મામલો પ્રકાશમાં આવ્યો હતો. અરજીમાં દલીલ કરવામાં આવી હતી કે આનાથી સ્પર્ધકો માટે અસમાન પરિસ્થિતિઓ ઊભી થઈ શકે છે અને માંગ કરવામાં આવી હતી કે પરીક્ષા એક જ શિફ્ટમાં લેવામાં આવે.
નોંધનીય છે કે આ પરીક્ષા અગાઉ ૧૫ જૂને બે શિફ્ટમાં યોજાવાની હતી, પરંતુ સુપ્રીમ કોર્ટે આ ફોર્મેટ સામે વાંધો ઉઠાવ્યો હતો અને પરીક્ષા મુલતવી રાખી હતી. કોર્ટે સ્પષ્ટતા કરી હતી કે બે શિફ્ટમાં પરીક્ષા લેવાથી મુશ્કેલી સ્તરમાં તફાવત થઈ શકે છે, જે ઉમેદવારોને અન્યાય કરી શકે છે.
બીએનઈ એ પોતાની તરફેણમાં કહ્યું કે સુપ્રીમ કોર્ટના ૩૦ મેના આદેશ મુજબ, એક જ શિફ્ટમાં પરીક્ષાનું આયોજન કરવું ફરજિયાત છે. આવી સ્થિતિમાં, ૨૫૦ થી વધુ શહેરોમાં પરીક્ષા કેન્દ્રો એક
સાથે પરીક્ષા લેવા માટે જરૂરી રહેશે અને ૧,૦૦૦ થી વધુ કેન્દ્રો બુક કરીને સક્રિય કરવા પડશે. તેમણે પોતાની અરજીમાં જણાવ્યું હતું કે પરીક્ષા હવે ૩ ઓગસ્ટના રોજ સવારે ૯ વાગ્યાથી બપોરે ૧૨ઃ૩૦ વાગ્યા સુધી યોજાશે. આ તારીખ તેમના ટેકનિકલ ભાગીદાર ટાટા કન્સલ્ટન્સી સર્વિસીસ દ્વારા પૂરી પાડવામાં આવેલી સૌથી નજીકની શક્ય તારીખ છે.
