ડિસેમ્બરની શરૂઆતથી જ ગુજરાતમાં ઠંડીએ કહેર મચાવી દીધો છે. જેમ જેમ દિવસો વધી રહ્યા છે તેમ તેમ ઠંડીની તીવ્રતા પણ વધી રહી છે. સમગ્ર રાજ્યનું તાપમાન સતત ઘટી રહ્યું છે. રાજ્યના મોટાભાગના શહેરોમાં તાપમાન ૧૫ ડિગ્રી સેલ્સિયસથી નીચે ગગડી ગયું છે. ઠંડીની મહત્તમ અસર નલિયામાં જાવા મળી રહી છે જ્યાં તાપમાન ૭.૮ ડિગ્રી નોંધાયું હતું. આ સાથે જ હવામાન વિભાગે કચ્છમાં ઠંડીનું મોજુ ફરી વળવાની આગાહી કરી છે. આ સાથે વિભાગે જણાવ્યું હતું કે આગામી દિવસોમાં ગુજરાતમાં ઠંડીનું પ્રમાણ વધુ વધશે.
હવામાન વિભાગના અમદાવાદ કેન્દ્રના ડાયરેક્ટર એકે દાસે જણાવ્યું હતું કે ગુજરાતમાં આગામી ૭ દિવસ સુધી હવામાન સૂકું રહેશે. આ સાથે ૭ દિવસમાં તાપમાનમાં કોઈ મોટો ફેરફાર થવાની આશા નથી. આ સાથે ગુજરાતમાં ઠંડી વધવા પાછળનું કારણ જણાવતા તેમણે કહ્યું કે પવનની ઝડપ ૫ થી ૧૦ નોટની છે, જેમાં ઠંડકનું પરિબળ પણ છે, જેના કારણે રાજ્યમાં ઠંડીનો અનુભવ થઈ રહ્યો છે.
હવામાન વિભાગે આપેલી માહિતી મુજબ છેલ્લા ૨૪ કલાકમાં સૌથી નીચું તાપમાન નલિયામાં નોંધાયું છે. નલિયામાં ૭.૮, અમરેલીમાં ૯.૬, ડીસામાં ૯.૯, મહુવામાં ૧૦.૯, ગાંધીનગરમાં ૧૧, રાજકોટમાં ૧૧, કેશોદમાં ૧૧.૫, ભુજમાં ૧૧.૬, વડોદરામાં ૧૨, પોરબંદરમાં ૧૨.૨ ડિગ્રી નોંધાયું હતું. ભાવનગર, સુરેન્દ્રનગરમાં ૧૨.૨. ૧૩.૪, વલ્લભવિદ્યાનગરમાં ૧૩.૮, અમદાવાદમાં ૧૪, કંડલા પોર્ટમાં ૧૪, સુરતમાં ૧૫.૨, દ્વારકામાં ૧૬.૪, વેરાવળમાં ૧૮.૫, ઓખામાં ૨૦.૪ ડિગ્રી તાપમાન નોંધાયું છે. આ આંકડા દર્શાવે છે કે ગુજરાતના મોટાભાગના વિસ્તારોમાં લઘુત્તમ તાપમાનમાં વધારો થયો છે.
હવામાન વિભાગની આગાહી અનુસાર સૌરાષ્ટ્રમાં ઠંડીનો ચમકારો જાવા મળશે. આગામી ૫ દિવસે તાપમાનમાં ઘટાડો થાય તેવી શક્યતા છે. તાપમાનમાં ૧-૨ ડિગ્રીની વધ-ઘટ થવાની સંભાવના છે. ઉત્તર-પૂર્વથી પૂર્વના પવન ફુંકાતા ઠંડીનો અનુભવ થાય તેવી શક્યતા છે. તાપમાન વધવા છતા પવનના લીધે ઠંડી વર્તાશે.
હવામાન નિષ્ણાત પરેશ ગોસ્વામીની આગાહી મુજબ ડિસેમ્બરના અંતિમ અઠવાડિયામાં ગુજરાતમાં કાતિલ ઠંડી પડશે.હાલ જે ઠંડી પડી રહી છે તેમાં ત્રણ દિવસ ઠંડીમાં આંશિક રાહત મળશે. ત્યાર બાદ ઠંડીનો કાતિલ રાઉન્ડ શરૂ થશે. ૧૮ ડિસેમ્બર બાદ રાજ્યમાં ઠંડીનો કહેર જાવા મળશે. ડિસેમ્બરના છેલ્લા સપ્તાહમાં તાપમાનનો પારો ગગડશે.પરેશ ગોસ્વામીની આગાહી મુજબ આ સમય દરમિયાન છેલ્લા પાંચ વર્ષની રેકોર્ડ બ્રેક ઠંડી પડી શકે છે.
