ધારી તાલુકાના વાવડી ગામ નજીક એક ખેડૂતની વાડી વિસ્તારમાં મોડી રાતે દીપડો આવી ચડ્‌યો હતો. જેણે શ્વાનનો શિકાર કરવા શ્વાન પાછળ દોટ મૂકી હતી. આ દરમિયાન ભાગતાં ભાગતાં શ્વાન જીવ બચાવવા ખુલ્લા કૂવામાં ખાબકી જતા પાછળ શિકાર કરવા આવેલો દીપડો પણ ઊંડા કૂવામાં ખાબકતાં બંનેના મોત થયા હતા. આ ઘટનાની જાણ સ્થાનિક ખેડૂતોને થતા તેમણે વનવિભાગને જાણ કરતા રેન્જ વનવિભાગની ટીમ દોડી આવી હતી અને પ્રથમ મૃત દીપડાનું રેસ્ક્યુ ઓપરેશન કરી બહાર કાઢ્યો હતો. જેના
મૃતદેહને પી.એમ. માટે એનિમલ કેર સેન્ટરમાં ખસેડવામાં આવ્યો છે. હાલ પીએમ માટેની કાર્યવાહી હાથ ધરવામાં આવી છે. વનવિભાગના કર્મચારીઓ સાથે સ્થાનિક ખેડૂતોએ પણ મદદ કરી હતી અને દીપડાને બહાર કાઢવામાં આવ્યો હતો.