ધારી તાલુકામાં આવેલા દેવળા ગામે વનરાજોના ધાડાએ ભારે આતંક મચાવ્યો છે. ગત રાત્રિએ અંદાજે અઢારથી વધુ સિંહોના એક વિશાળ ઝૂંડે રહેણાંક વિસ્તાર નજીક ધસી આવી માલધારીના પશુઓ પર હિંસક હુમલો કર્યો હતો. આ કરૂણ ઘટનામાં કુલ ૧૧ જેટલા નિર્દોષ પશુઓના કમકમાટી ભર્યા મોત નિપજ્યા છે.
સિંહોના આ આક્રમક હુમલાને કારણે ગરીબ માલધારી પરિવારને વ્યાપક આર્થિક નુકસાની વેઠવાનો વારો આવ્યો છે. ગામમાં અવારનવાર સિંહો દ્વારા કરવામાં આવતા પશુઓના મારણને લીધે સ્થાનિક ગ્રામજનોમાં અત્યારે ભારે ફફડાટ અને ચિંતાનો માહોલ જોવા મળી રહ્યો છે. ગ્રામવાસીઓએ આ ગંભીર બાબતે વન વિભાગને ત્વરિત જાણ કરી છે અને ભવિષ્યમાં આવી ઘટનાઓ ન બને તે માટે કડક સુરક્ષા પગલાં લેવાની ઉગ્ર માંગ કરી છે.
