અમરેલી જિલ્લામાં લોકસભાની ચૂંટણીમાં ભાજપ તરફી મતદાન થાય તે માટે જિલ્લાના ધારાસભ્યો ગ્રામ્ય વિસ્તારોનો પ્રવાસ ખેડી રહ્યાં છે. ધારાસભ્યોએ ગ્રામ્ય વિસ્તારોમાં ગ્રામજનોને ભરતભાઈ સુતરીયાને જંગી લીડથી વિજયી બનાવવા માટે આહ્વાન કર્યુ છે. આ ચૂંટણીમાં મહિલાઓ પણ મહત્વનો ભાગ ભજવે તે માટે મહિલાઓને પણ જવાબદારી સોંપવામાં આવી છે. અમરેલી લોકસભાના ઉમેદવાર ભરતભાઇ સુતરીયાના સમર્થનમાં ધારાસભ્ય મહેશભાઈ કસવાલાની અધ્યક્ષતામાં સાવરકુંડલા મહિલા મોરચાની બેઠક મળી હતી. કેન્દ્ર સરકાર તેમજ રાજય સરકારની મહિલા સશક્તિકરણની વિવિધ યોજનાઓ વિશે માહિતી આપી આયોજન ઘર-ઘર સુધી પહાંચે અને મહિલાઓને લાભ મળે તેવું આયોજન કરવા મહિલા મોરચાને અનુરોધ કર્યો હતો. આ તકે શહેર ભાજપ પ્રમુખ પ્રવિણભાઈ સાવજ, નગરપાલિકા પ્રમુખ મેહુલભાઈ ત્રિવેદી, મહિલા મોરચા પ્રમુખ નયનાબેન કાપડિયા, સંગઠન મહિલા મોરચાના હોદ્દેદારો, નગરપાલિકાના મહિલા હોદ્દેદારો, સદસ્યો ઉપસ્થિત રહ્યા હતા.
