આગામી કેટલાક દિવસોમાં ભારતના મોટાભાગના ભાગોમાં હવામાનની સ્થિતિ બદલાતી રહેવાની ધારણા છે, જેમાં તાપમાનમાં વધઘટ, ગરમીનું મોજું, ગરમ રાત અને કેટલાક વિસ્તારોમાં વરસાદનો સમાવેશ થાય છે. પંજાબ, હરિયાણા, દિલ્હી અને રાજસ્થાનના વિસ્તારોમાં મહત્તમ તાપમાન ધીમે ધીમે વધવાની શક્યતા છે, જ્યારે પૂર્વી અને મધ્ય ભારતના વિસ્તારોમાં તાપમાનમાં ઘટાડો જોવા મળી શકે છે.
હવામાન વિભાગે દિલ્હી, હરિયાણા, પંજાબ, રાજસ્થાન, મધ્યપ્રદેશ, પશ્ચિમ બંગાળ, ગુજરાત, બિહાર, ઝારખંડ અને ઓડિશા માટે હીટવેવની ચેતવણી જારી કરી છે. આગામી ૨૪ કલાક દરમિયાન, દિલ્હી-એનસીઆર, હરિયાણા, ચંદીગઢ, રાજસ્થાનમાં મહત્તમ તાપમાન ૧-૩ ડિગ્રી સેલ્સીયસ વધી શકે છે. આ રાજ્યોમાં ૧ મે સુધી ગરમીથી રાહત મળવાની કોઈ આશા નથી. દેશના બાકીના ભાગોમાં મહત્તમ તાપમાનમાં કોઈ નોંધપાત્ર ફેરફાર થવાની શક્યતા નથી.
હવામાન વિભાગે દિલ્હીમાં ભારે ગરમીની આગાહી કરી છે. હવામાન વિભાગના જણાવ્યા અનુસાર, આજે દિલ્હીમાં મહત્તમ તાપમાન ૪૨ ડિગ્રી સેલ્સીયસની આસપાસ રહી શકે છે. દિલ્હી-એનસીઆરના લોકો છેલ્લા ઘણા દિવસોથી ભીષણ ગરમીથી પીડાઈ રહ્યા છે.
આગામી ૭ દિવસ દરમિયાન ઉત્તરપૂર્વ ભારતમાં વાવાઝોડા અને ભારે પવન સાથે વરસાદની આગાહી છે. આ સમયગાળા દરમિયાન, ૪૦-૫૦ કિમી પ્રતિ કલાકની ઝડપે પવન ફૂંકાઈ શકે છે. ૨૬ એપ્રિલે અરુણાચલ પ્રદેશ, આસામ અને મેઘાલયમાં વાવાઝોડા સાથે ભારે વરસાદની શક્યતા છે. ૨૮ અને ૨૯ એપ્રિલે નાગાલેન્ડ, મિઝોરમ અને ત્રિપુરામાં ભારે વરસાદ પડી શકે છે. કર્ણાટક, તટીય આંધ્રપ્રદેશ, યાનમ, તેલંગાણા, રાયલસીમા, કેરળ, તમિલનાડુ, પુડુચેરી અને કરાઈકલમાં ગાજવીજ સાથે હળવોથી મધ્યમ વરસાદ થઈ શકે છે.
હવામાન વિભાગે જણાવ્યું હતું કે ૨૭-૨૯ એપ્રિલ દરમિયાન પૂર્વી ભારત અને પૂર્વી ઉત્તર પ્રદેશમાં વાવાઝોડા સાથે છૂટાછવાયાથી હળવો વરસાદ પડી શકે છે. આ સમયગાળા દરમિયાન, ૪૦-૫૦ કિમી પ્રતિ કલાકથી ૬૦ કિમી પ્રતિ કલાકની ઝડપે ભારે પવન ફૂંકાય તેવી શક્યતા છે. ૨૭ એપ્રિલે બિહાર, ઝારખંડ, છત્તીસગઢ અને પશ્ચિમ બંગાળમાં હળવાથી મધ્યમ વરસાદની સંભાવના છે. આજે ઉત્તરીય આંતરિક કર્ણાટકમાં કરા પડવાની સંભાવના છે.
