યુએસમાં રાષ્ટ્રપતિ ડોનાલ્ડ ટ્રમ્પ ફરીથી સત્તામાં આવ્યા પછી ૭ મહિનામાં રોજગાર બજારની સ્થિતિ નબળી પડી છે. નવી નોકરીઓનું સર્જન લગભગ બંધ થઈ ગયું છે અને ફુગાવો ફરીથી માથું ઉંચકવા લાગ્યો છે. શુક્રવારે જાહેર થયેલા ઓગસ્ટ જાબ્સ રિપોર્ટમાં દર્શાવવામાં આવ્યું છે કે ફક્ત ૨૨,૦૦૦ નવી નોકરીઓનું સર્જન થયું છે, જે અપેક્ષા કરતા ઘણું ઓછું છે. આ સાથે, બેરોજગારી દર ૪.૩% પર પહોંચી ગયો છે, જે છેલ્લા ૪ વર્ષમાં સૌથી વધુ છે. તમને જણાવી દઈએ કે ટ્રમ્પ દ્વારા ભારત સહિત તમામ દેશો પર ટેરિફ લાદવાની રણનીતિ અપનાવ્યા પછી આ સમાચાર સામે આવ્યા છે.
રિપોર્ટ મુજબ, જૂનમાં અમેરિકામાં ૧૩૦૦૦ નોકરીઓ ગુમાવી દેવામાં આવી હતી, જે ડિસેમ્બર ૨૦૨૦ પછીનો પ્રથમ માસિક ઘટાડો છે. ફેક્ટરીઓ અને બાંધકામ ક્ષેત્રમાં નોકરીઓનું નુકસાન જોવા મળ્યું છે. એપ્રિલમાં, ટ્રમ્પે કહ્યું હતું કે તેમની ટેરિફ નીતિ નોકરીઓ અને કારખાનાઓ પાછી લાવશે, પરંતુ ત્યારથી ઉત્પાદનમાં ૪૨૦૦૦ અને બાંધકામમાં ૮૦૦૦ નોકરીઓ ગુમાવી દેવામાં આવી છે. ટ્રમ્પે ૨૦૨૪માં વચન આપ્યું હતું કે તેમની નીતિઓ અર્થતંત્રને નવી ઊંચાઈએ લઈ જશે. પરંતુ વાસ્તવમાં અર્થતંત્ર ધીમું પડી રહ્યું છે. ટ્રમ્પે દાવો કર્યો હતો કે તેલ સમૃદ્ધ બનશે, તેને ‘પ્રવાહી સોનું’ ગણાવ્યું હતું, પરંતુ તેલ અને ગેસ ક્ષેત્રમાં પણ ૧૨૦૦૦ નોકરીઓ ગુમાવી દેવામાં આવી છે.
ટ્રમ્પે પહેલા દિવસથી જ ફુગાવો ખતમ કરવાનો અને વીજળીના ભાવ અડધા કરવાનો વાયદો કર્યો હતો. પરંતુ એપ્રિલમાં ૨.૩ ટકાનો વાર્ષિક ફુગાવાનો દર જુલાઈમાં વધીને ૨.૭ ટકા થયો. આ વર્ષે વીજળીના ભાવમાં પણ ૪.૬ ટકાનો વધારો થયો છે. ટ્રમ્પની ટેરિફ નીતિએ વોલમાર્ટ અને પ્રોક્ટર એન્ડ ગેમ્બલ જેવી ઘણી કંપનીઓને ભાવ વધારવાની ફરજ પાડી છે. ટ્રમ્પે નબળા આર્થિક ડેટા માટે ફેડરલ રિઝર્વના ચેરમેન જેરોમ પોવેલને દોષી ઠેરવ્યા છે. તેમનું કહેવું છે કે જો વ્યાજ દર ઘટાડવામાં આવે તો નોકરીઓ વધશે. જાકે, નિષ્ણાતો કહે છે કે વ્યાજ દર આટલી ઝડપથી ઘટાડવાથી ફુગાવો વધુ વધી શકે છે.
ટ્રમ્પે ૨૦૨૪ માં કહ્યું હતું કે ગેરકાયદેસર ઇમિગ્રન્ટ્સને દૂર કરવાથી ‘કાળી નોકરીઓ’નું રક્ષણ થશે, પરંતુ કાળા સમુદાયનો બેરોજગારી દર ૭.૫ ટકા સુધી પહોંચી ગયો, જે ઓક્ટોબર ૨૦૨૧ પછીનો સૌથી વધુ છે. તેમની ઇમિગ્રેશન નીતિઓએ કામદારોની અછત વધારી દીધી છે, જેણે નોકરી બજારને ખરાબ રીતે અસર કરી છે. ટ્રમ્પે ગયા મહિને નબળા નોકરીઓના અહેવાલ બાદ બ્યુરો ઓફ લેબર સ્ટેટિસ્ટીક્સ કમિશનર એરિકા મેકએન્ટાર્ફરને બરતરફ કર્યા હતા. તેમણે પુરાવા વિના દાવો કર્યો કે આંકડાઓ તેમની વિરુદ્ધ ‘હેરાફેરી’ કરવામાં આવ્યા હતા.
વ્હાઇટ હાઉસના આર્થિક સલાહકાર કેવિન હેસેટે કહ્યું કે ઓગસ્ટનો ડેટા એક અપવાદ હતો અને અર્થતંત્ર ટૂંક સમયમાં ગતિ પકડશે. તેમણે દાવો કર્યો કે એટલાન્ટા ફેડરલ રિઝર્વ ૩% ત્રિમાસિક વૃદ્ધિની અપેક્ષા રાખે છે. પરંતુ બિડેન વહીવટના ભૂતપૂર્વ અધિકારી ડેનિયલ હોર્નગે જણાવ્યું હતું કે ઓગસ્ટના ડેટામાં સુધારાના કોઈ સંકેતો દેખાતા નથી. પ્રગતિશીલ સેનેટર એલિઝાબેથ વોરેને કહ્યું, ‘ટ્રમ્પની નીતિઓ નોકરી બજારને બગાડી રહી છે.’ ડેમોક્રેટ સેનેટર ચક શૂમરે કહ્યું, ‘ટ્રમ્પની ટેરિફ અને આડેધડ નીતિઓ અર્થતંત્રને નુકસાન પહોંચાડી રહી છે. આ એક ચેતવણી છે કે ટ્રમ્પ આપણા અર્થતંત્રને નષ્ટ કરી રહ્યા છે.’
