આસામમાં જારદાર ચૂંટણી પ્રચાર દરમિયાન, ઝારખંડના મુખ્યમંત્રી હેમંત સોરેને ભાજપ પર આકરા પ્રહાર શરૂ કર્યા અને ઝારખંડ સરકારની સિદ્ધિઓ પર પ્રકાશ પાડ્યો. તેમણે કોકરાઝાર જિલ્લાના ગોસાઈગાંવ વિધાનસભા મતવિસ્તારમાં આયોજિત જાહેર સભામાં ફ્રેડ્રિક્સન હંસદાના સમર્થનમાં જનતાને સંબોધિત કરી.
પોતાના ભાષણમાં, સોરેને આદિવાસી સમુદાયની ઐતિહાસિક બહાદુરીનો ઉલ્લેખ કરતા કહ્યું કે આ ચૂંટણી ફક્ત સત્તા પરિવર્તન વિશે નથી, પરંતુ અધિકારો માટેની લડાઈ છે. તેમણે લોકોને ચૂંટણીની લાલચથી સાવધ રહેવા અને શિક્ષણ પર ધ્યાન કેન્દ્રિત કરવાની અપીલ કરી, જેને તેમણે તેમની સૌથી મોટી તાકાત ગણાવી.
ચા બગીચાના કામદારોનો મુદ્દો ઉઠાવતા તેમણે કહ્યું કે તેઓ દેશના અર્થતંત્રમાં મહત્વપૂર્ણ યોગદાન આપે છે, પરંતુ તેમને હજુ સુધી તેમનો હક મળ્યો નથી. તેમણે આરોપ લગાવ્યો કે ચૂંટણી દરમિયાન લોકોને પૈસાની લાલચ આપવામાં આવે છે, પરંતુ પાછળથી તેમનું શોષણ કરવામાં આવે છે.
શિક્ષણ પર ઝારખંડ મોડેલનો ઉલ્લેખ કરતા, સોરેને કહ્યું કે ત્યાંની સરકારી શાળાઓની સ્થિતિમાં સુધારો થયો છે અને મોટી સંખ્યામાં વિદ્યાર્થીઓ સ્પર્ધાત્મક પરીક્ષાઓમાં ભાગ લઈ રહ્યા છે. તેમણે દાવો કર્યો કે ઝારખંડ સરકાર આદિવાસી વિદ્યાર્થીઓ માટે ઉચ્ચ શિક્ષણનો ખર્ચ ઉઠાવી રહી છે અને આવી વ્યવસ્થા આસામમાં પણ લાગુ થવી જાઈએ. તેમણે પોતાના સંબોધનમાં એવો પણ આરોપ લગાવ્યો કે કેટલાક રાજકીય પક્ષો બંધારણીય સંસ્થાઓનો દુરુપયોગ કરે છે અને મીઠા વચનો આપીને જનતાને ગેરમાર્ગે દોરે છે. સોરેને કહ્યું કે તેમનો ઉદ્દેશ્ય સત્યને ઉજાગર કરવાનો અને આગામી પેઢીને શિક્ષિત અને સશક્ત બનાવવાનો છે.
