ઝારખંડમાં વિધાનસભા ચૂંટણી વચ્ચે ભાજપ ડેમેજ કંટ્રોલમાં વ્યસ્ત છે. ભાજપે નારાજ ડો.રવીન્દ્ર કુમાર રાયને ઝારખંડ ભાજપના કાર્યકારી અધ્યક્ષ તરીકે નિયુક્ત કર્યા છે. રવિન્દ્ર કુમાર રાય ભાજપના ઝારખંડના પૂર્વ અધ્યક્ષ રહી ચૂક્યા છે. કહેવાય છે કે રવીન્દ્ર રાય વિધાનસભા ચૂંટણીમાં ટિકિટ ન મળવાથી નારાજ હતા. તેમનો આદર કરવાના પ્રયાસરૂપે અને સંસ્થામાં તેમના અનુભવને ધ્યાનમાં રાખીને તેમને આ જવાબદારી સોંપવામાં આવી છે.
ટિકિટ ન મળવાથી નારાજ રવિન્દ્ર રાયને ઝારખંડના ચૂંટણી પ્રભારી અને કેન્દ્રીય મંત્રી શિવરાજ સિંહ ચૌહાણે સમજાવ્યા હતા. રવિન્દ્ર રાય ઝારખંડના ધનવરથી ટિકિટ માંગી રહ્યા હતા પરંતુ પાર્ટીએ તેમને ટિકિટ આપી ન હતી. રાય છેલ્લા બે વખતથી ઝારખંડ વિધાનસભાની ચૂંટણી હારી રહ્યા છે.
રવીન્દ્ર રાય ભૂમિહાર જાતિમાંથી આવે છે. ૨૦૧૪ થી ૨૦૧૯ સુધી કોડરમાથી સાંસદ રહી ચુક્યા છે. તેઓ વિધાનસભાની ચૂંટણી પહેલા ટિકિટ ન મળતા નારાજ હતા. હાલમાં ઝારખંડ ભાજપના અધ્યક્ષ બાબુલાલ મરાંડી છે. તેમના કાર્યકાળ દરમિયાન ભાજપે રાયને કાર્યકારી અધ્યક્ષ બનાવીને તેમને મોટી જવાબદારી સોંપી હતી. આ રીતે ભાજપે ઝારખંડમાં જ્ઞાતિ સમીકરણને પણ હલ કરવાનો પ્રયાસ કર્યો છે.
ભાજપે ઝારખંડમાં પોતાના ૪૦ સ્ટાર પ્રચારકોની યાદી જાહેર કરી છે. આ યાદીમાં પહેલું નામ પીએમ મોદીનું છે. જેપી નડ્ડા અને રાજનાથ સિંહ બીજા અને ત્રીજા સ્થાને છે. કેન્દ્રીય ગૃહમંત્રી અમિત શાહ ચોથા નંબરે છે. આ સાથે રાજ્યમાંથી બાબુલાલ મરાંડી, અમર કુમાર બૌરી અને પૂર્વ પ્રદેશ અધ્યક્ષ રવિન્દ્ર રાયને સ્ટાર પ્રચારક બનાવવામાં આવ્યા છે. આ સિવાય
સ્ટાર પ્રચારકોની યાદીમાં પૂર્વ સાંસદ કડિયા મુંડા, જામતારાથી ચૂંટણી લડી રહેલા સીતા સોરેન, પૂર્વ મુખ્યમંત્રી અને ચાઈબાસાના ઉમેદવાર ચંપાઈ સોરેનનો પણ સમાવેશ થાય છે. જ્યારે અન્ય રાજ્યોની વાત કરીએ તો હરિયાણાના સીએમ નાયબ સિંહ સૈની, ઓડિશાના મુખ્યમંત્રી મોહન ચરણ માંઝી, છત્તીસગઢના મુખ્યમંત્રી વિષ્ણુદેવ સાંઈ અને મધ્યપ્રદેશના મુખ્યમંત્રી મોહન યાદવને પણ સ્ટાર પ્રચારક બનાવવામાં આવ્યા છે.યાદીમાં હજુ પણ ઘણા નામો છે. ઝારખંડની ૮૧ સીટો પર બે તબક્કામાં મતદાન. પ્રથમ તબક્કાનું મતદાન ૧૩મી નવેમ્બરે છે જ્યારે બીજા તબક્કાનું મતદાન ૨૦મી નવેમ્બરે છે. પરિણામ ૨૩ નવેમ્બરે જાહેર કરવામાં આવશે.
