બેંગલુરુની એક ખાસ કોર્ટે શુક્રવારે જનતા દળ (સેક્યુલર) ના નેતા અને ભૂતપૂર્વ સાંસદ પ્રજ્વલ રેવન્નાને બળાત્કાર કેસમાં દોષિત ઠેરવ્યા છે. આ કેસ હાસન જિલ્લાના હોલેનારસીપુરા ગ્રામીણ પોલીસ સ્ટેશનમાં તેમની સામે નોંધાયેલો પહેલો બળાત્કારનો કેસ હતો. પ્રજ્વલ રેવન્ના સામેનો આ કેસ ખૂબ ચર્ચામાં હતો. હવે આ કેસમાં સજા શનિવારે જાહેર થવાની છે. આ કેસની સુનાવણી બેંગલુરુની ખાસ કોર્ટમાં ચાલી રહી છે.
બેંગલુરુ સ્થિત સાંસદ/ધારાસભ્ય વિશેષ અદાલતે ૧૮ જુલાઈના રોજ બળાત્કાર કેસની સુનાવણી પૂર્ણ કરી હતી. તેણે પોતાનો નિર્ણય અનામત રાખ્યો હતો. સજા હવે શનિવાર (૨ ઓગસ્ટ) ના રોજ જાહેર થવાની છે.
રેવન્ના ગયા વર્ષે નોંધાયેલા ચાર ફોજદારી કેસોમાં મુખ્ય આરોપી છે. જ્યારે ૨,૦૦૦ થી વધુ પોર્નોગ્રાફિક વિડિઓ કલીપ્સ, જેમાં કથિત રીતે ઘણી મહિલાઓના જાતીય શોષણનું ચિત્રણ કરવામાં આવ્યું હતું. આ બધી વિડિઓ કલીપ્સ સોશિયલ મીડિયા પર વાયરલ થઈ હતી.
રેવન્ના સામે પહેલી ફરિયાદ એપ્રિલ ૨૦૨૪ માં એક મહિલા દ્વારા દાખલ કરવામાં આવી હતી જે તેના પરિવારના ફાર્મહાઉસમાં ઘરેલુ સહાયક તરીકે કામ કરતી હતી. તેણીએ રેવન્ના પર ૨૦૨૧ થી વારંવાર બળાત્કાર કરવાનો અને જો તેણીએ આ ઘટના વિશે કોઈને કહ્યું તો દુર્વ્યવહારના વિડિઓઝ જાહેર કરવાની ધમકી આપવાનો આરોપ લગાવ્યો હતો.
તમને જણાવી દઈએ કે ભૂતપૂર્વ સાંસદ પ્રજ્વલ રેવન્ના, જે જનતા દળ (સેક્યુલર) ના નેતા અને કર્ણાટકના હસન લોકસભા મતવિસ્તારના ભૂતપૂર્વ સાંસદ છે. તેઓ ભૂતપૂર્વ વડા પ્રધાન એચડી દેવગૌડાના પૌત્ર અને કર્ણાટકના ભૂતપૂર્વ મંત્રી એચડી રેવન્નાના પુત્ર છે.
