જૂન મહિનામાં ચોમાસુ બેઠા બાદ શરૂઆત કેવી રહી અને કેટલો અને કેવો વરસાદ પડ્યો છે તેની માહિતી ભારતીય હવામાન વિભાગ દ્વારા માસિક રિપોર્ટમાં આપવામાં આવી છે. સાથે જ જુલાઈ મહિનામાં દેશભરમાં કેવો વરસાદ રહેશે તેની આગાહી પણ કરી છે. શુક્રવારે માસિક આગાહી આપતાં હવામાન વિભાગે જણાવ્યું કે, દેશમાં જુલાઈ દરમિયાન વરસાદ એકંદરે સામાન્ય રહેશે. જોકે, બિહાર, ઝારખંડ, પશ્ચિમ બંગાળ, ઓડિશા, છત્તીસગઢ જેવા પૂર્વના વિસ્તારો તેમજ ઉત્તપૂર્વના વિસ્તારોમાં વરસાદ સામાન્યથી ઓછો રહી શકે છે.
જૂન મહિનામાં વરસાદની આઠ ટકા ખોટ નોંધાઈ હતી પરંતુ મહિનાનો કુલ વરસાદનો આંક જોઈએ તો તે ‘સામાન્ય’ની કેટેગરીમાં આવે છે, કારણકે હવામાન વિભાગ ‘ઘટ’ ત્યારે જ ગણે છે જ્યારે ‘સામાન્ય’ આંકડા કરતાં ૧૦ ટકા કે તેનાથી વધુ ઘટ નોંધાઈ હોય.
ઉત્તરપૂર્વ ભારતમાં ખરીફ પાકની વાવણી હાલ પૂરજોશમાં ચાલી રહી છે અને ચોમાસુ વહેલું બેસી જતાં આ સીઝનમાં સામાન્ય કરતાં એકર દીઠ વધુ વાવણી થશે તેવો અંદાજો છે. સામાન્ય રીતે ૮ જુલાઈથી સમગ્ર દેશમાં ચોમાસુ બેસી જતું હોય છે પરંતુ આ વખતે તેના બે દિવસ પહેલા એટલે કે બુધવાર (૬ જુલાઈ)થી જ મેઘરાજો દેશને ઘમરોળશે. જોકે, ગત ચોમાસામાં સમગ્ર દેશમાં વરસાદ ૧૩ જુલાઈએ પડ્યો હતો, જે સામાન્ય તારીખ કરતાં પાંચ દિવસ મોડો હતો.
વાવણીની ગતિવિધિઓ પર નજર રાખતાં એક અધિકારીએ કહ્યું, “ઉત્તરપૂર્વમાં ચોમાસુ થોડું જલ્દી બેસી જતાં આ પ્રદેશમાં એકર દીઠ ખરીફ પાકની વાવણીમાં વધારો જોવા
મળશે.”
જુલાઈમાં ‘સામાન્ય’ વરસાદની આગાહી કરતાં ભારતીય હવામાન વિભાગે પોતાના માસિક બુલેટિનમાં કહ્યું, “ભૌગોલિક વિતરણ સૂચવે છે કે, ઉત્તર ભારત, મધ્ય ભારત અને દક્ષિણ દ્વીપકલ્પના મોટાભાગના વિસ્તારોમાં સામાન્યથી લઈને સામાન્ય કરતાં વધુ વરસાદ પડશે.”