અમરેલી જિલ્લામાં નગરપાલિકાઓ અને ૧૧ તાલુકા પંચાયતોની સામાન્ય ચૂંટણીઓ શાંતિપૂર્ણ અને નિષ્પક્ષ રીતે સંપન્ન થાય તે હેતુથી અધિક જિલ્લા મેજિસ્ટ્રેટ દ્વારા સમગ્ર જિલ્લામાં જાહેરનામું અમલી બનાવવામાં આવ્યું છે. આ જાહેરનામા મુજબ મતદાન મથકની અંદર તેમજ તેની આસપાસના ૧૦૦ મીટરના ઘેરાવામાં કોઈપણ પ્રકારના પ્રચાર-પ્રસાર પર સંપૂર્ણપણે રોક લગાવવામાં આવી છે. મતદાન મથક પરિસરમાં મોબાઈલ ફોન, વાયરલેસ સેટ કે અન્ય કોઈપણ વિજાણુ સંદેશાવ્યવહારના સાધનો લઈ જવા પર સખત મનાઈ છે. મતદારોને ડરાવવા-ધમકાવવા, લાલચ આપવી કે ચોક્કસ ઉમેદવારના પક્ષમાં મતદાન કરવા દબાણ કરવું એ કાયદાકીય ગુનો ગણાશે. વધુમાં મતદાન મથકની અંદર માત્ર અધિકૃત વ્યક્તિઓ જ પ્રવેશ મેળવી શકશે અને ઉમેદવારોના એજન્ટોએ પણ નિયત સંખ્યામાં જ હાજર રહેવાનું રહેશે. મતદારોએ શિસ્તબદ્ધ રીતે લાઇનમાં ઊભા રહી ક્રમશઃ મતદાન કરવાનું રહેશે અને મતદાન પૂરું થયા બાદ તુરંત જ તે સ્થળ છોડવાનું રહેશે.
