આજે જાફરાબાદ શહેરમાં કોળી સમાજની વાડી ખાતે એક ભવ્ય હિન્દુ મહાસંમેલનનું આયોજન કરવામાં આવ્યું હતું. આ કાર્યક્રમ વિશ્વ હિન્દુ પરિષદના ૬૦ વર્ષ પૂર્ણ થવાના ઉપલક્ષ્યમાં યોજાયો હતો. કાર્યક્રમની શરૂઆત સાધુ સંતો અને આગેવાનો દ્વારા દીપ પ્રાગટ્યથી થઈ હતી. ત્યારબાદ, નાનાં બાળકો દ્વારા હિન્દુ સંસ્કૃતિને જાગૃત કરતું એક મનમોહક ગીત રજૂ કરવામાં આવ્યું હતું. ભાવનગર વિભાગના નવનિયુક્ત વાલી ભાષ્કરભાઈ મુખ્ય વક્તા તરીકે હાજર રહ્યા હતા અને તેમના અધ્યક્ષ સ્થાને આ સંમેલનનું આયોજન કરવામાં આવ્યું હતું. કાર્યક્રમની શરૂઆતમાં, જાફરાબાદના પૂર્વ વિશ્વ હિન્દુ પરિષદ અને બજરંગ દળના પ્રમુખ કરણભાઈ બારીયાના તાજેતરમાં થયેલા નિધન બદલ શોક વ્યક્ત કરવામાં આવ્યો હતો. તેમના આત્માની શાંતિ માટે સર્વ ઉપસ્થિત લોકોએ બે મિનિટનું મૌન પાળ્યું હતું. આ મહાસંમેલનમાં જાફરાબાદ શહેર અને આસપાસના વિસ્તારોમાંથી મોટી સંખ્યામાં લોકો ઉપસ્થિત રહ્યા હતા. વિશ્વ હિન્દુ પરિષદ, બજરંગ દળ, દુર્ગાવાહિની અને માતૃશક્તિ જેવા વિવિધ હિન્દુ સંગઠનોના કાર્યકરો ઉપરાંત, આજુબાજુના ગામડાઓના સરપંચો, જાફરાબાદ તાલુકા પંચાયતના પ્રમુખ અને આરએસએસના કાર્યકરો પણ હાજર રહ્યા હતા.
