જંગલ અને રેવન્યુ વિભાગની સરહદે આવેલા હરમડિયા, એભલવડ, મોરવાડ, આલીદર અને પીછવી સહિતના ગામોમાં વિવિધ સરકારી વિભાગો દ્વારા સંયુક્ત કોમ્બિંગ ઓપરેશન હાથ ધરવામાં આવ્યું. વન વિભાગ, પોલીસ વિભાગ, ખાણ-ખનીજ વિભાગ અને PGVCL અધિકારીઓએ આ વિસ્તારમાં સઘન તપાસ અભિયાન ચલાવ્યું. આ દરમિયાન વાડીઓમાં ખુલ્લા વીજ વાયરો, ઇલેક્ટ્રિક ફેન્સિંગ અને ખનીજ સંબંધિત ગેરકાયદે પ્રવૃત્તિઓની તપાસ કરવામાં આવી. ઉચ્ચ અધિકારીઓએ ગામોમાં જાહેર બેઠકો યોજી વન્યપ્રાણીઓના રક્ષણની મહત્તા સમજાવી હતી. વાડી માલિકોને ખુલ્લા વાયરો, ખુલ્લા કૂવા અને ઇલેક્ટ્રિક ફેન્સિંગ રાખવાથી થતા ગંભીર ગુનાઓ અંગે ચેતવણી આપવામાં આવી. અધિકારીઓએ સ્થાનિક લોકોને જણાવ્યું કે જંગલી પ્રાણીઓનું રક્ષણ અને જતન કરવું એ દરેક નાગરિકની ફરજ છે. આ સાથે વન્યજીવન સુરક્ષા માટે કાયદાકીય જોગવાઈઓ અને દંડની રકમ વિશે પણ માહિતગાર કરવામાં આવ્યા.
