પંજાબના તરનતારનની એક કોર્ટે આમ આદમી પાર્ટી (આપ)ના ધારાસભ્ય મનજિંદર સિંહ લાલપુરાને ૨૦૧૩ના છેડતી અને હુમલો કેસમાં દોષિત ઠેરવ્યા છે. આ કેસ લગ્ન સમારોહમાં એક મહિલાની છેડતી સાથે સંબંધિત છે. કોર્ટે ધારાસભ્યને કસ્ટડીમાં લેવાનો આદેશ આપ્યો છે અને ૧૨ સપ્ટેમ્બરે તેની સજા જાહેર કરવામાં આવશે.આ ઘટના ૨૦૧૩ ની છે, જ્યારે ખદૂર સાહિબના ધારાસભ્ય મનજિંદર સિંહ લાલપુરા એક લગ્ન સમારોહમાં હાજરી આપી હતી. સમારોહમાં આવેલી અનુસૂચિત જાતિની એક પરિવારની છોકરીની છેડતી અને મારપીટ કરવામાં આવી હતી. આ કેસમાં, એડિશનલ સેશન્સ જજ પ્રેમ કુમારની કોર્ટે લાલપુરાને મુખ્ય આરોપી તરીકે દોષિત ઠેરવ્યા છે.અગાઉ, સ્થાનિક કોર્ટે આપ ધારાસભ્ય હરમીત સિંહ પઠાણમાજરાની આગોતરા જામીન અરજી ફગાવી દીધી હતી. ધારાસભ્ય સામે બળાત્કારનો કેસ નોંધાયેલ છે. પઠાણમાજરાના વકીલ સિમરનજીત સિંહ સગ્ગુએ જણાવ્યું હતું કે એડિશનલ સેશન્સ જજ નવદીપ કૌર ગિલે ધારાસભ્યની અરજી ફગાવી દીધી હતી. સગ્ગુએ કહ્યું કે હવે ધારાસભ્ય પંજાબ અને હરિયાણા હાઈકોર્ટનો સંપર્ક કરશે. કોર્ટે અગાઉ બુધવાર સુધી ધારાસભ્યની અરજી પર સુનાવણી મુલતવી રાખી હતી.એક મહિલાની ફરિયાદ પર, પોલીસે ૧ સપ્ટેમ્બરના રોજ સિવિલ લાઇન્સ પોલીસ સ્ટેશનમાં પઠાણમાજરા વિરુદ્ધ બળાત્કાર, છેતરપિંડી અને ધાકધમકીનો કેસ નોંધ્યો હતો. મહિલાએ આરોપ લગાવ્યો છે કે ધારાસભ્યએ છૂટાછેડા લીધેલા હોવાનો દાવો કરીને તેની સાથે સંબંધ બાંધ્યો હતો અને ૨૦૨૧ માં તેની સાથે લગ્ન કર્યા હતા, જ્યારે તે પહેલાથી જ પરિણીત હતો. મહિલાએ તેના પર સતત જાતીય શોષણ, ધમકી આપવા અને અશ્લીલ સામગ્રી મોકલવાનો પણ આરોપ લગાવ્યો હતો. પહેલી વાર ધારાસભ્ય બનેલા પઠાણમાજરા ૨ સપ્ટેમ્બરથી ફરાર છે. પંજાબ પોલીસ જ્યારે તેમને હરિયાણાના કરનાલથી ધરપકડ કરવા ગઈ ત્યારે તેઓ પોલીસ કસ્ટડીમાંથી ભાગી ગયા હતા.
