ઝારખંડના ચાંડિલમાં સવારે ૪ઃ૧૫ વાગ્યે આદ્રા રેલ્વે ડિવિઝનના ચાંડિલ રેલ્વે સ્ટેશન નજીક પોલ નંબર ૩૭૫/૨૨ પાસે બે માલગાડીઓ સામસામે અથડાઈ. આ ટક્કર એટલી ગંભીર હતી કે બંને ટ્રેનોના અનેક ડબ્બા પાટા પરથી ઉતરી ગયા અને એન્જિનને ભારે નુકસાન થયું. ટક્કર બાદ ટ્રેક પર કાટમાળ ફેલાઈ ગયો, જેના કારણે અપ અને ડાઉન બંને લાઇન પર કામગીરી સંપૂર્ણપણે ઠપ્પ થઈ ગઈ.પ્રાપ્ત માહિતી અનુસાર, એક માલગાડી ટાટાનગરથી બોકારો જઈ રહી હતી, જ્યારે બીજી બોકારોથી ટાટાનગર આવી રહી હતી. પ્રારંભિક તપાસમાં, સિગ્નલિંગ સિસ્ટમમાં ટેકનિકલ ખામી હોવાની શંકા છે. જાકે, હાલમાં રેલવે વહીવટીતંત્રના વરિષ્ઠ અધિકારીઓ દ્વારા ઘટનાના કારણોની તપાસ કરવામાં આવી રહી છે.સ્થાનિક લોકો પાસેથી મળેલી માહિતી મુજબ, એક માલગાડી ટાટાનગરથી પુરુલિયા જઈ રહી હતી. ચાંદિલ સ્ટેશન પાર કર્યા પછી, તે પાટા પરથી ઉતરી ગઈ. પાટા પરથી ઉતરેલી માલગાડીના ઘણા ડબ્બા વિરુદ્ધ દિશામાંથી આવતા ટ્રેક પર આવી ગયા. તે જ સમયે, વિરુદ્ધ દિશામાંથી આવતી બીજી માલગાડી તે કોચ સાથે અથડાઈ, જેના કારણે બીજી માલગાડીના ઘણા કોચ પણ પાટા પરથી ઉતરી ગયા. આ અકસ્માત પિટકી રેલ્વે ફાટક અને ચાંદિલ સ્ટેશન વચ્ચે થયો હતો.ચાંદિલ-ટાટાનગર અને ચાંદિલ-બોકારો રૂટ પર ચાલતી બધી પેસેન્જર અને માલગાડી ટ્રેનોનું સંચાલન હાલ પૂરતું રદ કરવામાં આવ્યું છે. ઘણી ટ્રેનોને રદ કરવાનો, ડાયવર્ટ કરવાનો અથવા ટૂંકા ટર્મિનેશન કરવાનો નિર્ણય લેવામાં આવ્યો છે.ટ્રેકને સરળતાથી પુનઃસ્થાપિત કરવામાં ઓછામાં ઓછા ૨૪ કલાક લાગી શકે છે. હાલમાં, રેલ્વે વિભાગના વરિષ્ઠ અધિકારીઓ ઘટનાસ્થળે પહોંચી ગયા છે અને ઘટનાની માહિતી લઈ રહ્યા છે, આ સાથે રાહત અને સમારકામનું કાર્ય પણ શરૂ થઈ ગયું છે.
