સૌરાષ્ટ્રના અગ્રીમ એવા ગોંડલ માર્કેટિંગ યાર્ડમાં આ સિઝનમાં ડુંગળીની રેકોર્ડબ્રેક આવક નોંધાઈ હતી. યાર્ડ બહાર મંગળવારે સવારથી સૌરાષ્ટ્રભરમાંથી ખેડૂતો જણસી લઈને આવ્યા હોવાથી રાતના ૯ વાગ્યા સુધીમાં અંદાજે ૨ હજારથી વધુ વાહનોની ૭ થી ૮ કિલોમીટર લાંબી લાઈન થઇ હતી. યાર્ડમાં અંદાજે બે લાખ કટ્ટાની આવક થઇ હતી. હજુ પણ યાર્ડની બહાર ડુંગળી ભરેલા ૫૦૦થી વધુ વાહનોની લાઈન લાગી હોય વહેલામાં વહેલી તકે તેની હરાજી કરાશે. હરાજીમાં ડુંગળીના ૨૦ કિલોનો રૂ. ૨૦૦ થી રૂ. ૮૫૦ સુધીનો ભાવ બોલાયો હતો. આ યાર્ડ લાલ ડુંગળીની આવકમાં મોખરાનું સ્થાન ધરાવે છે. આ અંગે યાર્ડના ચેરમેન અલ્પેશભાઈ ઢોલરિયાએ જણાવ્યું હતું કે, લાલ ડુંગળીની ખરીદી માટે રાજસ્થાન, કર્ણાટક, ઓરિસ્સા, મહારાષ્ટ્ર સહિત દેશભરમાંથી મોટી મોટી કંપનીઓના એક્સપર્ટ યાર્ડમાં આવે છે. આજે યાર્ડમાં ડુંગળીની સિઝનની રેકોર્ડબ્રેક આવક થતાં સત્તાધીશોએ અન્ય જાહેરાત ન કરવામાં આવે ત્યાં સુધી ડુંગળીની આવક સદંતર બંધ કરવા જણાવ્યું છે.
