રાજ્યમાં આગામી સ્થાનિક સ્વરાજ્યની ચૂંટણીઓનો માહોલ ગરમાયો છે ત્યારે ગોંડલ શહેરનું વહીવટી તંત્ર અને પોલીસ વિભાગ એક્શન મોડમાં આવ્યું છે. કાયદો અને વ્યવસ્થાની સ્થિતિ જળવાઈ રહે અને નાગરિકો નિર્ભય બની મતદાન કરી શકે તે માટે પોલીસ દ્વારા ખાસ સુરક્ષા પ્લાન તૈયાર કરવામાં આવ્યો છે. રાજકોટ રેન્જ આઈજી અને જિલ્લા એસપીના સીધા માર્ગદર્શન હેઠળ ગોંડલ ડિવિઝનના અધિકારીઓએ શહેરના સંવેદનશીલ વિસ્તારોમાં ધામા નાખ્યા છે. આશાપુરા ચોકડી જેવા વ્યસ્ત માર્ગો પર ચેકપોસ્ટ ઉભી કરી દરેક વાહનોનું ઝીણવટભર્યું ચેકિંગ હાથ ધરવામાં આવ્યું છે. પોલીસના આ કાફલાએ મુખ્ય બજારો અને બસ સ્ટેન્ડ જેવા ભીડભાડવાળા વિસ્તારોમાં ફૂટ પેટ્રોલિંગ કરીને અસામાજિક તત્વો પર કડક ધાક બેસાડી છે. શાંતિપૂર્ણ મતદાન સુનિશ્ચિત કરવા માટે પોલીસની આ સક્રિયતાએ સ્થાનિક રહેવાસીઓમાં સુરક્ષાનો મજબૂત ભરોસો પેદા કર્યો છે.
