ગુજરાતમાં હાલ ભયંકર ઠંડીનો પ્રકોપ યથાવત્ રહેતાં લોકો ભારે ઠંડીનો સામનો કરી રહ્યા છે. રાજ્યના મોટાભાગના શહેરોમાં લઘુત્તમ તાપમાન ૧૦ ડિગ્રી સેલ્સિયસની આસપાસ નોંધાયું છે. હવામાન વિભાગના અપડેટ અનુસાર, આવતા કેટલાક દિવસો સુધી તાપમાનમાં ખાસ વધારો થવાની શક્યતા નથી. ઠંડીનું મોજું વધુ તીવ્ર બનવાની સંભાવના છે. ઉત્તર અને મધ્ય ગુજરાતના વિસ્તારોમાં સવારે બરફીલો પવન ફૂંકાઈ રહ્યો છે, જેના કારણે ઠંડીની અસર વધુ અનુભવી શકાય છે. લોકો ખાસ કરીને વહેલી સવારે અને રાત્રિ દરમિયાન ઘાઘરા પવનને કારણે ઠંડીમાં વૃદ્ધિ અનુભવી રહ્યા છે.હવામાન વિભાગ મુજબ આગામી ૧૦ દિવસ સુધી રાજ્યના મોટા ભાગના વિસ્તારોમાં શુષ્ક હવામાન રહેશે. તાપમાન લગભગ સમાન જ રહેશે. જાકે, દક્ષિણ ગુજરાતમાં પૂર્વીય પવનો સક્રિય થતા ત્યાંના વિસ્તારોમાં લઘુત્તમ તાપમાનમાં ૧ થી ૨ ડિગ્રીનો થોડો વધારો થઈ શકે છે.રાજ્યમાં નલીયાએ ફરી ઠંડીમાં ટોચ હાંસલ કરી છે. નલીયામાં સૌથી ઓછું ૧૦.૮ ડિગ્રી સેલ્સિયસ નોંધાતા તે રાજ્યનું સૌથી ઠંડું શહેર બન્યું છે. બાકીના જિલ્લાઓમાં પણ તાપમાન સામાન્ય કરતા ઓછું નોંધાયું છે, જેના કારણે ઠંડીની તીવ્રતા યથાવત્ છે.રાજ્યના મોટા ભાગના વિસ્તારોમાં લઘુત્તમ તાપમાનમાં ૧થી ૨ ડિગ્રીનો વધુ ઘટાડો નોંધાયો છે. અમદાવાદમાં પારો ૧૫.૧ ડિગ્રી સુધી નીચે ઉતર્યો જ્યારે ગાંધીનગરમાં ૧૩.૫ ડિગ્રી નોંધાયું. ઉત્તર ગુજરાતના ડીસામાં ૧૩.૩ ડિગ્રી અને વડોદરામાં ૧૪ ડિગ્રી તાપમાન નોંધાતા ઠંડીની અસર સ્પષ્ટ થઈ છે.કચ્છમાં ભુજમાં ૧૪.૫ ડિગ્રી અને કંડલામાં ૧૨.૬ ડિગ્રી નોંધાયું. અમરેલી અને કંડલા બંનેમાં ૧૨.૬ ડિગ્રી સાથે વધુ ઠંડીનો અનુભવ થયો. ભાવનગરમાં પણ પારો ઘટીને ૧૫.૮ ડિગ્રી પર પહોંચી ગયો છે.હવામાન વિભાગ અનુસાર આગામી દિવસોમાં પણ ઠંડીનું મોજું યથાવત્ રહેશે અને રાત્રિના તાપમાનમાં વધુ ઘટાડો થઈ શકે છે.નાગરિકોને વહેલી સવારે મુસાફરી ટાળવા, ગરમ વસ્ત્રો પહેરવા અને બાળકો-વૃદ્ધોની ખાસ કાળજી રાખવા સૂચના અપાઈ છે.
