ભારત અને રોયલ ચેલેન્જર્સ બેંગલુરુના સ્ટાર બેટ્સમેન વિરાટ કોહલીએ આ વર્ષે ૪ જૂને બેંગલુરુના ચિન્નાસ્વામી સ્ટેડિયમની બહાર થયેલા દુઃખદ અકસ્માત પર પોતાનું મૌન તોડ્યું છે. ખરેખર, આરસીબી ફ્રેન્ચાઇઝની આઇપીએલ વિજય યાત્રા દરમિયાન, ચિન્નાસ્વામી સ્ટેડિયમની બહાર ભાગદોડ મચી ગઈ હતી. આ અકસ્માતમાં ૧૧ લોકોએ જીવ ગુમાવ્યા હતા અને ઘણા લોકો ઘાયલ થયા હતા. જે ક્ષણ આરસીબી અને તેના ખેલાડીઓ માટે સૌથી મોટી સિદ્ધિ હોવી જાઈએ, તે જ દિવસે દુઃખ અને શોકમાં ફેરવાઈ ગઈ. હવે વિરાટ કોહલીએ આ મામલે પોતાની પહેલી પ્રતિક્રિયા આપી છે.
કોહલીએ આરસીબીના ‘એકસ’ એકાઉન્ટ પર શેર કરેલા સંદેશમાં કહ્યું, ‘જીવનમાં કંઈપણ તમને ૪ જૂને થયેલા આવા હૃદયભંગ માટે તૈયાર કરતું નથી. અમારી ફ્રેન્ચાઇઝીના ઇતિહાસમાં સૌથી ખુશ દિવસ શું હોવો જાઈએ… દુર્ઘટનામાં ફેરવાઈ ગયો.’ તેમણે આગળ કહ્યું, ‘હું સતત વિચારી રહ્યો છું અને એવા પરિવારો માટે પ્રાર્થના કરી રહ્યો છું જેમણે પોતાના પ્રિયજનો ગુમાવ્યા… અને ઘાયલ થયેલા ચાહકો માટે પણ. તમારું નુકસાન હવે અમારી વાર્તાનો ભાગ છે. આપણે બધા સાથે મળીને આગળ વધીશું… કાળજી, આદર અને જવાબદારી સાથે.’
સત્તાવાર તપાસમાં જાણવા મળ્યું કે સોશિયલ મીડિયા પર આમંત્રણ મોકલવામાં આવ્યા બાદ લગભગ ૨.૫ લાખ ચાહકો ચિન્નાસ્વામી સ્ટેડિયમમાં ઉમટી પડ્યા હતા. પોલીસે સ્વીકાર્યું કે તેઓ ભીડને કાબુમાં રાખવામાં નિષ્ફળ રહ્યા હતા અને આરસીબીને પરિસ્થિતિ માટે જવાબદાર ઠેરવવામાં આવ્યું હતું. તપાસમાં એમ પણ કહેવામાં આવ્યું છે કે યોગ્ય પરવાનગી અને વ્યવસ્થાનો અભાવ આ ભાગદોડનું મુખ્ય કારણ હતું.
આ અકસ્માત પછી, ફ્રેન્ચાઇઝીએ મૃતકોના પરિવારજનોને રૂ. ૨૫ લાખનું વળતર આપવાની જાહેરાત કરી છે. ઉપરાંત, ફ્રેન્ચાઇઝીએ આરસીબી કેર્સ નામનું એક ફાઉન્ડેશન શરૂ કર્યું છે. આ સંગઠને વચન આપ્યું છે કે ભવિષ્યમાં તે બીસીસીઆઇ અને કર્ણાટક ક્રિકેટ એસોસિએશન તેમજ સ્ટેડિયમ મેનેજમેન્ટ, રમતગમત સંસ્થાઓ અને લીગ ભાગીદારો સાથે મળીને વધુ સારા ભીડ વ્યવસ્થાપન પ્રોટોકોલ બનાવશે.
