અમરેલી જિલ્લાના ખાંભા પંથકમાં એક ત્રણ વર્ષની બાળકી સાથે અન્ય કોઈ નહી પરંતુ તેના સગ્ગા કાકાએ હેવાનિયત આચરી તેની નાની ભત્રીજી પર દુષ્કર્મ આચરતા સમગ્ર જિલ્લામાં હાહાકાર મચી ગયો છે. આવી નીચ હરકત કરનાર કાકા અને કાકી સામે લોકો ફીટકાર વરસાવી રહ્યાં છે. ખાંભા પંથકમાં ૩ વર્ષ અને ૧૧ મહિના ૭ દિવસની બાળકી ઉપર હવસખોર સગા કાકાએ દુષ્કર્મ આચર્યું હતું. જે અંગે ખાંભા પોલીસ સ્ટેશનમાં ફરિયાદ નોંધાતા પોલીસે કાકા અને કાકીને ઝડપી અલગ અલગ દિશામાં તપાસનો ધમધમાટ શરૂ કર્યો છે. બાળકીના પિતા હિરા ઘસવા ગયા હતા ત્યારે બાળકી ઘરે એકલી હતી. તે સમયે તેની એકલતાનો લાભ લઈ બાળકીને ચોકલેટ આપવાની લાલચ આપી કાકા અને કાકી તેમના ઘરે લઈ ગયા હતા. જે બાદ રૂમ બંધ કરીને સમાજને કલંકિત કરનાર આ કળિયુગના કાકાએ પોતાની હવષ સંતોષી હતી. આટલું જ નહીં કાકીએ પણ વિરોધ કરવાના બદલે તેને સાથ આપ્યો હતો. કાકીએ પગ પકડી રાખ્યાં હતા જ્યારે કાકાએ બાળકીને પીંખી નાખી હતી. બાળકીની કાકીએ મદદગારી કરી હતી જેને પગલે પોલીસે બંને સામે ગુનો નોંધી તેઓની ધરપકડ કરી છે. ઘટનાને લઈ ધારી એ.એસ.પી. જયવીર ગઢવીના સીધા સુપરવિઝન હેઠળ તપાસ ચાલી રહી છે. બન્ને આરોપીઓની પૂછપરછ શરૂ કરવામાં આવી છે. વધુ કેટલાક પુરાવા એકત્ર કરવા પોલીસે કવાયત હાથ ધરી છે. આ ઘટના જુલાઈ મહિનામાં બની હતી. જોકે, દુષ્કર્મની ઘટના બાદ આરોપી પરિવારનો જ સભ્ય હોવાને કારણે શરૂઆતમાં આવી ઘટના બની છે તેવું પરિવારના લોકો માનવા તૈયાર ન હતા. જે બાદ પરિવારની બદનામી ન થાય તે માટે પોલીસ સ્ટેશન આવ્યાં ન હતા, જેના કારણે ફરિયાદ મોડે મોડે નોંધાવી છે. એ.એસ.પી. જયવીર ગઢવીએ જણાવ્યું કે, તારીખ ૧૩-૧૧ના રોજ એક વ્યક્તિએ પોલીસ મથકે આવીને ફરિયાદ નોંધાવી હતી કે, તેમની ૩ વર્ષ ૧૧ મહિનાની દીકરી સાથે તેમના જ સગા નાના ભાઈએ દુષ્કર્મ આચર્યું છે. તેમજ તેમના નાના ભાઈની પત્નીએ મદદ કરી છે. વધુમાં જણાવ્યું કે, ૬-૭-૨૦૨૪ના રોજ તેઓ હિરા ઘસવા માટે બહાર ગયા હતા. ત્યારે ઘરે કોઈ હાજર ન હતા તે દરમિયાન ભોગબનનારના કાકા અને કાકીએ એકલતાનો લાભ લઈ ભોગબનનારને તેમના ઘરે લઈ ગયા હતા. રૂમનો દરવાજો બંધ કરીને તેની સાથે શારીરિક અડપલા કરી કાકાએ દુષ્કર્મ આચર્યું હતું. આ ઘટનાની જાણ થતાં જ ખાંભા પોલીસ સ્ટેશનમાં આ અંગેની ફરિયાદ નોંધવામાં આવી છે અને પોક્સો સહિત વિવિધ કલમ ઉમેરીને ગુનો નોંધવામાં આવ્યો છે. તેમજ આ બન્ને આરોપીની અટક કરવામાં આવી છે. આમ, સગા કાકાએ નાની બાળકી પર જ દુષ્કર્મ આચરતા આવા નરાધમો પર સમાજ ફીટકાર વરસાવી રહ્યો છે. આવા નરાધમોને કડકમાં કડક સજા થાય તેવુ લોકો ઈચ્છી રહ્યાં છે.
