ગુજરાત સરકારના પ્રધાનમંડળના વિસ્તરણમાં અમરેલીના ધારાસભ્ય અને વિધાનસભાના નાયબ મુખ્ય દંડક કૌશિકભાઈ વેકરીયાનો સમાવેશ કરવામાં આવ્યો છે. આ પ્રમોશનના સમાચાર મળતા જ અમરેલી જિલ્લામાં ભારતીય જનતા પાર્ટીના કાર્યકરો અને સમર્થકોમાં ખુશીનો માહોલ છવાઈ ગયો હતો. આ ખુશીની ઉજવણી જિલ્લા ભાજપ કાર્યાલય અને ધારાસભ્ય કૌશિકભાઈ વેકરીયાના કાર્યાલય નજીક ફટાકડા ફોડીને કરવામાં આવી હતી. મોટી સંખ્યામાં હોદ્દેદારો અને સમર્થકો ઉત્સાહભેર એકઠા થયા હતા. કૌશિકભાઈ વેકરીયાના વતન દેવરાજીયા ગામમાં પણ ફટાકડા ફોડવામાં આવ્યા હતા, પરિવારજનો અને ગ્રામજનોએ એકબીજાને મીઠાઈ ખવડાવી ખુશી વ્યક્ત કરી હતી.
મોટી સંખ્યામાં કાર્યકરો ગાંધીનગર પહોંચ્યા
મુખ્યમંત્રી ભૂપેન્દ્ર પટેલના મંત્રીમંડળના વિસ્તરણમાં કૌશિકભાઈ વેકરીયાને મોટી જવાબદારી મળવાની અપેક્ષાએ મોટી સંખ્યામાં જિલ્લાભરમાંથી કાર્યકરો ગાંધીનગર પહોંચ્યા હતા. મંત્રીમંડળમાં કૌશિકભાઈ વેકરીયાના નામની જાહેરાત થતા જ લોકોએ તેમના ગાંધીનગર નિવાસ્થાન ખાતે શુભેચ્છાઓ પાઠવી હતી. શપથ ગ્રહણ સમારોહમાં પણ જિલ્લાભરમાંથી આગેવાનો અને કાર્યકરોએ ઉત્સાહ સાથે ભાગ લીધો હતો.
