કોડીનાર તાલુકાના માલશ્રમ ગામમાં ચાર વર્ષ પહેલાં એક સગીરા પર બળાત્કાર આચરી, વીડિયો ક્લિપ વાયરલ કરવાની ધમકી આપવાના ગુનામાં કોર્ટે મુખ્ય આરોપીઓને ૨૦ વર્ષની સજા ફટકારી છે. ઘટના ૨૧ સપ્ટેમ્બર, ૨૦૨૦ના રોજ બની હતી, જ્યારે ૧૪ વર્ષની સગીરા દરજીની દુકાને કપડાં સીવડાવવા ગઈ હતી. મુખ્ય આરોપી હિતેષ કેશુ સોલંકીએ સગીરા પર બળાત્કાર આચર્યો, જ્યારે તેના મિત્ર પ્રકાશ સામત મોરાસીયાએ વીડિયો ક્લિપ બનાવી. આરોપીઓએ સગીરાને વીડિયો વાયરલ કરવાની ધમકી આપી હતી. પોલીસે ઝીણવટભરી તપાસ કરી, આરોપીઓને પકડ્યા અને પોક્સો કોર્ટમાં ચાર્જશીટ રજૂ કરી. સ્પેશિયલ પોક્સો કોર્ટે મુખ્ય આરોપીઓને ૨૦ વર્ષની સજા અને અન્ય બે આરોપીઓને ૩ વર્ષની સજા ફટકારી. આ ચુકાદાથી ગુનાહિત માનસિકતા ધરાવતા તત્વોમાં ફફડાટ ફેલાયો છે, જ્યારે પીડિતા અને તેના પરિવારને ચાર વર્ષે ન્યાય મળ્યો છે.
