આમ આદમી પાર્ટીના વડા અને દિલ્હીના મુખ્યમંત્રી અરવિંદ કેજરીવાલે એન્ફોર્સમેન્ટ ડિરેક્ટોરેટ (ઈડી) દ્વારા દિલ્હી સરકારના મંત્રી સત્યેન્દ્ર જૈનની ધરપકડને રાજકીય ખેલ ગણાવ્યો છે. તેમણે કહ્યું કે સત્યેન્દ્ર જૈન સંપૂર્ણપણે નિર્દોષ છે અને અમને અમારા ન્યાયતંત્રમાં વિશ્વાસ છે.
કેજરીવાલે મંગળવારે કહ્યું કે, મેં ઈડી દ્વારા સત્યેન્દ્ર જૈનની ધરપકડના કેસનો વ્યક્તિગત રીતે અભ્યાસ કર્યો છે, તે સંપૂર્ણ છેતરપિંડી છે. અમે ન તો ભ્રષ્ટાચાર કરીએ છીએ અને ન તો ભ્રષ્ટાચાર સહન કરીએ છીએ. અમારી પાસે ખૂબ જ પ્રમાણિક સરકાર છે. મુખ્યમંત્રીએ ઈડીની આ કાર્યવાહીને હિમાચલ પ્રદેશ વિધાનસભા ચૂંટણી સાથે જોડીને કહ્યું કે જૈનને રાજકીય કારણોસર નિશાન બનાવવામાં આવ્યા છે. અમને અમારા ન્યાયતંત્રમાં વિશ્વાસ છે.
જોણકારી અનુસાર એન્ફોર્સમેન્ટ ડિરેક્ટોરેટ (ઈડી)એ સોમવારે દિલ્હીના સ્વાસ્થ્ય મંત્રી અને આમ આદમી પાર્ટીના નેતા સત્યેન્દ્ર જૈનની ધરપકડ કરી છે. ઈડ્ઢનું કહેવું છે કે જૈન તેમની સામે ચાલી રહેલી મની લોન્ડરિંગ તપાસમાં કેન્દ્રીય તપાસ એજન્સીને સહકાર આપી રહ્યા નથી. જૈન આ કેસમાં કથિત રીતે સામેલ હોવાનું કહેવાય છે.
કોલકાતા સ્થિત કંપની સાથે સંકળાયેલા હવાલા વ્યવહારો સંબંધિત કેસમાં પ્રિવેન્શન ઓફ મની લોન્ડરિંગ એક્ટની કલમો હેઠળ કેન્દ્રીય એજન્સી દ્વારા જૈનની ધરપકડ કરવામાં આવી છે. જૈનની ધરપકડ તેમના પરિવારની રૂ. ૪.૮૧ કરોડની સંપત્તિ અને તેમના દ્વારા નિયંત્રિત કંપનીઓને જપ્ત કર્યાના એક મહિના બાદ કરવામાં આવી છે.