પશ્ચિમ બંગાળ વિધાનસભામાં વિરોધ પક્ષના નેતા સુવેન્દુ અધિકારીના કાફલા પર કૂચ બિહાર જિલ્લામાં હુમલો કરવામાં આવ્યો હોવાના અહેવાલ છે. એવું જાણવા મળ્યું છે કે વિરોધ પ્રદર્શન દરમિયાન, તૃણમૂલ કોંગ્રેસના કાર્યકરોએ શુભેન્દુના કાફલા પર હુમલો કર્યો હતો. જાકે, તૃણમૂલ કોંગ્રેસે આ આરોપોને સુનિયોજિત નાટક ગણાવ્યું હતું. ઉત્તર બંગાળ જિલ્લામાં કૂચ બિહાર પોલીસ અધિક્ષક કાર્યાલયની બહાર ભાજપ વિરોધ પ્રદર્શનનું નેતૃત્વ કરવા ગયેલા અધિકારીને ખાગરાબારી વિસ્તાર નજીક સૂત્રોચ્ચારનો સામનો કરવો પડ્યો અને તેમને કાળા ઝંડા બતાવવામાં આવ્યા.
ભાજપના નેતાઓના જણાવ્યા અનુસાર, બપોરે ૧૨.૩૫ વાગ્યાની આસપાસ જ્યારે અધિકારીનો કાફલો આ વિસ્તારમાંથી પસાર થઈ રહ્યો હતો ત્યારે તૃણમૂલ કોંગ્રેસના પક્ષના ધ્વજ અને કાળા ઝંડા લઈને એક ટોળું ખાગરાબારી ક્રોસિંગ પર એકત્ર થયું હતું. વિરોધીઓએ ‘પાછા જાઓ’ ના નારા લગાવ્યા અને તેમના વાહન પર જૂતા ફેક્યો હોવાના અહેવાલ છે. તેમના કાફલામાં ઓછામાં ઓછી એક કાર, જેમાં પોલીસ એસ્કોર્ટ વાહનનો સમાવેશ થાય છે, તેના કાચ તૂટી ગયા હતા.
જિલ્લામાં પાર્ટીના ધારાસભ્યો પર થયેલા તાજેતરના હુમલાઓના વિરોધમાં ભાજપના કાર્યકરોએ કૂચ બિહાર પોલીસ અધિક્ષક કાર્યાલયનો ઘેરાવ કરવાની યોજના બનાવી હતી. વિધાનસભામાં વિરોધ પક્ષના નેતા મુલાકાત દરમિયાન પોલીસ અધિક્ષકને મળવાના હતા. ભાજપે આ હુમલા માટે શાસક તૃણમૂલ કોંગ્રેસને દોષી ઠેરવી હતી અને દાવો કર્યો હતો કે તે વિરોધ પક્ષના નેતાને ડરાવવાનો પૂર્વઆયોજિત પ્રયાસ હતો. જાકે, તૃણમૂલ કોંગ્રેસે દાવો કર્યો હતો કે તોડફોડમાં તૃણમૂલના કોઈ કાર્યકર્તા સામેલ નહોતા અને આ હુમલો ભાજપની આંતરિક વિખવાદનું પરિણામ હતું. સ્થળ પરથી મળેલા ચિત્રોમાં, વિરોધીઓ તૃણમૂલ કોંગ્રેસના ધ્વજ લહેરાવતા અને કાફલામાં રહેલા વાહનો પર ભીડમાંથી જૂતા ફેંકતા જાઈ શકાય છે. આ ઘટનામાં કોઈ ઘાયલ થયું છે તેની હજુ સુધી પુષ્ટિ થઈ નથી. જિલ્લા વહીવટીતંત્ર અને પોલીસે હજુ સુધી આ ઘટના અંગે કોઈ સત્તાવાર નિવેદન જારી કર્યું નથી.
કૂચ બિહારમાં તૃણમૂલ કોંગ્રેસના નેતાઓના જણાવ્યા અનુસાર, તેઓએ મંગળવારે જિલ્લાના વિવિધ ભાગોમાં ‘ભાષા આંદોલન’નું આયોજન કર્યું હતું. સ્થાનિક તૃણમૂલ નેતૃત્વએ એસપી ઓફિસ સુધી કૂચ કરવાની અધિકારીની યોજનાના જવાબમાં વિરોધ કાર્યક્રમોની જાહેરાત કરી હતી. ટીએમસીના કૂચ બિહાર એકમે જણાવ્યું હતું કે આ કાર્યક્રમના ભાગ રૂપે, કૂચ બિહારમાં ૧૯ સ્થળોએ ધરણા કરવામાં આવ્યા હતા. આ સ્થળોમાંનું એક કૂચ બિહારમાં ખાગરાબારી હતું, જ્યાં શુભેન્દુ અધિકારીના કાફલાની આસપાસ વિરોધ પ્રદર્શનો થયા હતા.
