બોલિવૂડનો સૌથી વ્યસ્ત અભિનેતા અક્ષય કુમાર જે વર્ષમાં ચારથી પાંચ ફિલ્મો કરે છે, આજે તેણે ૫૭મો જન્મદિવસ મનાવ્યો હતો.ભારતીય સિનેમા જગતમાં ખિલાડી કુમાર તરીકે ઓળખાતો અક્ષય કુમાર હવે એક નવી પોસ્ટ શેર કરીને ચાહકોને ચોંકાવી દીધા છે. પ્રખ્યાત નિર્દેશક પ્રિયદર્શન અને સુપરસ્ટાર અક્ષય કુમારની જોડી ફરી એકસાથે આવે તેની સૌ રાહ જોઈ રહ્યા હતા. આજે એ રાહનો અંત આવ્યો છે. ૧૪ વર્ષ પછી આ બંને એક હોરર કોમેડી ‘ભૂત બંગલા’ પર સાથે કામ કરી રહ્યા છે જે એકતા કપૂર અને બાલાજી ટેલિફિલ્મ્સ લિમિટેડના બેનર હેઠળ બનાવવામાં આવી રહી છે અને ફરા શેખ અને વેદાંત બાલી દ્વારા સહ-નિર્માતા છે.
અક્ષય કુમારે ગણેશ ચતુર્થી પર એક મોશન પોસ્ટર રિલીઝ કરીને બધાને ચોંકાવી દીધા હતા, જે સંકેત આપે છે કે તેમના જન્મદિવસના ખાસ અવસર પર એક મોટી જાહેરાતનું આયોજન કરવામાં આવ્યું છે. અભિનેતાએ આખરે આ સમાચારનું અનાવરણ કર્યું છે, તેણે સોશિયલ મીડિયા પર એક રસપ્રદ મોશન પોસ્ટર શેર કર્યું છે. આ મોશન પોસ્ટમાં તે એક ડરામણા ભૂતિયા બંગલાની સામે ઉભો જોવા મળે છે. એક તરફ પૂર્ણ ગોળ ચંદ્ર દેખાય છે, જ્યારે બીજી બાજુ એક કાળી બિલાડી તેના ખભા પર બેઠી છે અને તે તેના હાથમાં દૂધનો વાટકો પકડેલો જોવા મળે છે. અક્ષયની ફિલ્મની આ પોસ્ટ એકદમ ક્રેઝી છે અને તેની ફિલ્મની જાહેરાત કરવાની રીત પણ ઘણી ફની છે.
મોશન પોસ્ટર શેર કરતી વખતે, અક્ષય કુમારે ઇન્સ્ટાગ્રામ પોસ્ટને કેપ્શન આપ્યું, ‘દર વર્ષે મારા જન્મદિવસ પર તમારા પ્રેમ માટે આભાર! ‘ભૂત બંગલા’ના ફર્સ્ટ લુક સાથે આ વર્ષની ઉજવણી! ૧૪ વર્ષ પછી ફરી પ્રિયદર્શન સાથે કામ કરવા માટે હું ખૂબ જ ઉત્સાહિત છું. આ સ્વપ્ન સહયોગ લાંબા સમયથી આવી રહ્યો છેપ આ અવિશ્વસનીય પ્રવાસ તમારા બધા સાથે શેર કરવા માટે રાહ જોઈ શકતો નથી. જાદુ માટે ટ્યુન રહો!’ અક્ષય કુમારની આ પોસ્ટ જોઈને ફેન્સ ઉત્સાહિત છે. ફેન્સ આ જોડીને ફરીથી સાથે જોવા માટે ખુશી વ્યક્ત કરી રહ્યા છે.
પ્રિયદર્શન અને અક્ષય કુમારે અત્યાર સુધી એકસાથે સૌથી વધુ ફેવરિટ ફિલ્મો બનાવી છે. તેણે દર્શકોને ‘હેરા ફેરી’, ‘ગરમ મસાલા’, ‘ભાગમ ભાગ’, ‘ભૂલ ભુલૈયા’ અને ‘દે દાના દન’ જેવી કાલાતીત ક્લાસિક ફિલ્મો આપી છે, જેણે દર્શકોના દિલમાં ખાસ સ્થાન બનાવ્યું છે. એક સમય એવો આવ્યો જ્યારે આ જોડી સેન્સેશન બની ગઈ. તેમની દરેક ફિલ્મ સુપરહિટ સાબિત થઈ છે. તેમની ફિલ્મોના સંવાદો રોજિંદા જીવનનો એક ભાગ બની ગયા હતા. તેથી હવે તેઓ ફરીથી સાથે આવી રહ્યા છે, અને આ વખતે આ જોડી પડદા પર શું લાવશે તે જોવું રસપ્રદ રહેશે.
