પૂર્ણિયા જિલ્લાના ૦૫૮-કસ્બા વિધાનસભા મતવિસ્તારમાં ચૂંટણીના ઉત્સાહ વચ્ચે, એનડીએ ઉમેદવાર અને નવા ચૂંટાયેલા ધારાસભ્ય નિતેશ કુમાર સિંહ માટે એક નવી સમસ્યા ઊભી થઈ છે. તેમના ચૂંટણી સોગંદનામામાં ખોટી અથવા અધૂરી માહિતી આપવામાં આવી હોવાના આરોપસર એક ગંભીર ફરિયાદ દાખલ કરવામાં આવી છે, જેના પગલે વહીવટીતંત્રે તાત્કાલિક કાર્યવાહી શરૂ કરી છે.
ફરિયાદની ગંભીરતાને ધ્યાનમાં રાખીને, ૫૮-કસ્બાના ડેપ્યુટી કલેક્ટર અને રિટ‹નગ ઓફિસર, પ્રીતિ કુમારીએ તાત્કાલિક અસરથી વિગતવાર તપાસ માટે તેને પૂર્ણિયાના ડેપ્યુટી ચૂંટણી અધિકારીને મોકલી છે. ૧૨ નવેમ્બરના રોજ ડીસીએલઆર ઓફિસ દ્વારા જારી કરાયેલ પત્ર નંબર ૮૭, નાયબ ચૂંટણી અધિકારીને ફરિયાદની સંપૂર્ણ તપાસ કરવા અને તારણોના આધારે કાનૂની કાર્યવાહી સુનિશ્ચિત કરવા સ્પષ્ટપણે સૂચના આપે છે.
સમગ્ર મામલાના જવાબમાં, ધારાસભ્ય નિતેશ કુમાર સિંહે જણાવ્યું હતું કે, “અમને આ ફરિયાદની જાણ નહોતી. એક અરજી આવી હતી જેમાં કહેવામાં આવ્યું હતું કે કેટલીક વિગતો પૂરતી નથી. અમને અમારા સોગંદનામામાં આપવામાં આવેલી બધી માહિતી પર સંપૂર્ણ વિશ્વાસ છે, તેથી ચિંતા કરવાની કોઈ જરૂર નથી.”
આ ફરિયાદ પૂર્ણિયાના ડીસ્ટ્રીક્ટ બાર એસોસિએશનના એડવોકેટ અનિલ કુમાર ઝા દ્વારા દાખલ કરવામાં આવી હતી. ફરિયાદની વિગતો જાહેર કરવામાં આવી નથી, પરંતુ પત્રનો વિષય સ્પષ્ટપણે દર્શાવે છે કે આ મામલો નિતેશ કુમાર સિંહના નામાંકન સાથેના સોગંદનામામાં આપવામાં આવેલી માહિતીની સત્યતા સાથે સંબંધિત છે.
સૂત્રોના જણાવ્યા અનુસાર, તપાસ સોગંદનામામાં ઉલ્લેખિત સંપત્તિ, જવાબદારીઓ અને ગુનાહિત રેકોર્ડ જેવી માહિતીની સત્યતા ચકાસશે. તપાસ અહેવાલના પરિણામની સીધી અસર કસ્બા મતવિસ્તારના ચૂંટણી રાજકારણ પર પડી શકે છે.
