કર્ણાટકમાંથી એક હૃદયદ્રાવક દ્રશ્ય સામે આવ્યું છે. અહીં લોકોએ એક મુસ્લિમ મહિલાને તાલિબાની સજા આપી છે. મહિલાને મસ્જીદની સામે ઉભી રાખવામાં આવી હતી અને ટોળાએ તેને ખરાબ રીતે માર માર્યો હતો, જેના કારણે મહિલાની હાલત ગંભીર બની ગઈ હતી. આ ઘટનાનો એક વીડિયો પણ સામે આવ્યો હતો, ત્યારબાદ પોલીસે કાર્યવાહી કરી હતી અને ૬ લોકોની ધરપકડ કરી હતી. આ ઘટના ૯ એપ્રિલના રોજ બની હોવાનું કહેવાય છે. હદ તો એ હતી કે આ આખી ઘટના મસ્જીદની સામે બની હતી અને ભીડમાંથી કોઈએ તેને રોકવાનો પ્રયાસ પણ ન કર્યો.
કર્ણાટકના દાવણગેરેથી હિંસાની એક ચોંકાવનારી ઘટના પ્રકાશમાં આવી છે. ચન્નાગિરી તાલુકાના તવરકેરેમાં એક મસ્જીદની બહાર ધોળા દિવસે ટોળા દ્વારા એક મહિલા પર ક્રૂર હુમલો કરવામાં આવ્યો હતો અને તેનો એક વીડિયો બનાવીને સોશિયલ મીડિયા પર પોસ્ટ કરવામાં આવ્યો હતો, જેના કારણે લોકોમાં રોષ ફેલાયો હતો. તમને જણાવી દઈએ કે, ૯ એપ્રિલના રોજ કર્ણાટકમાં તવરેકેરે ગામની રહેવાસી ૩૮ વર્ષીય પીડિતા શબીના બાનુ પર મસ્જીદની સામે ટોળાએ લાકડીઓ, પાઇપ અને પથ્થરોથી હુમલો કર્યો હતો.
હકીકતમાં, ઘટનાના બે દિવસ પહેલા, એટલે કે ૭ એપ્રિલના રોજ, શબીનાના એક સંબંધી, ૩૨ વર્ષીય નસરીન અને ફયાઝ નામનો એક વ્યક્તિ તેને મળવા આવ્યા હતા અને પછી ત્રણેય થોડા સમય માટે બહાર ફરવા ગયા હતા. આ પછી, જ્યારે શબીનાના પતિ જમીલ અહેમદ ઉર્ફે શમીર ઘરે પાછો ફર્યો અને તેણે નસરીન અને ફયાઝ બંનેને પોતાના ઘરમાં જાયા, ત્યારે તે ગુસ્સે થઈ ગયો અને સ્થાનિક જામા મસ્જીદમાં આ અંગે ફરિયાદ નોંધાવી. ત્યારબાદ, ૯ એપ્રિલના રોજ, શબીના, નસરીન અને ફયાઝને મસ્જીદમાં બોલાવવામાં આવ્યા હતા જ્યાં ટોળાએ જાહેરમાં શબીનાને મસ્જીદની બહાર નિર્દયતાથી માર માર્યો હતો, જે તાલિબાન દ્વારા આપવામાં આવેલી સજા સમાન હતી, જેના કારણે શબીના ગંભીર રીતે ઘાયલ થઈ હતી. જાકે, હવે મહિલાની હાલતમાં સુધારો થઈ રહ્યો છે. કોઈએ આખી ઘટના પોતાના મોબાઈલમાં રેકોર્ડ કરી અને સોશિયલ મીડિયા પર શેર કરી, ત્યારબાદ પોલીસ એક્શનમાં આવી.
જ્યારે આ લડાઈનો વીડિયો વાયરલ થયો, ત્યારે દાવણગેરે પોલીસમાં ફરિયાદ નોંધાવવામાં આવી, અને થોડા કલાકોમાં પોલીસે તમામ ૬ આરોપીઓની ધરપકડ કરી. પોલીસે આ બધા વિરુદ્ધ મહિલા સાથે હુમલો અને ગેરવર્તણૂક કરવાનો કેસ નોંધ્યો છે અને તેમની સામે હત્યાના પ્રયાસનો કેસ પણ દાખલ કરવામાં આવ્યો છે. ચન્નાગિરી પોલીસ સ્ટેશનમાં એફઆઇઆર નંબર ૨૦૨/૨૦૨૫ હેઠળ કેસ નોંધવામાં આવ્યો છે, જેમાં ભારતીય દંડ સંહિતા હેઠળ કાવતરું, હુમલો અને હત્યાના પ્રયાસ સંબંધિત કલમો સહિત અનેક આરોપો મૂકવામાં આવ્યા છે.
પોલીસે આરોપીઓની ઓળખ પણ કરી છે, જેમાં વ્યવસાયે ડ્રાઇવર મોહમ્મદ નિયાઝ, ભંગાર વેપારી મોહમ્મદ ગૌસ્પિર, શેરડીનો રસ વેચનાર ચાંદ બાશા, ઇનાયત ઉલ્લાહ અને બાઇક મિકેનિક દસ્તગીર અને રસૂલ ટી.આર.નો સમાવેશ થાય છે. , જે બુક્કમ્બુધિ તળાવમાં માછીમાર તરીકે કામ કરે છે. આ બધા આરોપીઓ તવરેકેરેના રહેવાસી છે.
