જાણીતા પત્રકાર અને રાજકારણી એમજે અકબર ફરી એકવાર વડા પ્રધાન નરેન્દ્ર મોદીની ટીમમાં પાછા ફર્યા છે. હકીકતમાં, કેન્દ્ર સરકાર આતંકવાદ પર પાકિસ્તાનનો પર્દાફાશ કરવા અને ભારતનો પક્ષ રજૂ કરવા માટે વિવિધ દેશોમાં સર્વપક્ષીય પ્રતિનિધિમંડળ મોકલી રહી છે, જેમાં એમજે અકબરનું નામ પણ સામેલ છે. ૭ વર્ષ પહેલા ૨૦૧૮માં, ‘મી ટુ વિવાદ’ના આરોપો બાદ એમજે અકબરને વિદેશ રાજ્યમંત્રી પદેથી રાજીનામું આપવું પડ્યું હતું.
રવિશંકર પ્રસાદના નેતૃત્વ હેઠળના પ્રતિનિધિમંડળમાં એમજે અકબરને સ્થાન આપવામાં આવ્યું છે. આ પ્રતિનિધિમંડળ યુનાઇટેડ કિંગડમ, ફ્રાન્સ, જર્મની, ઇટાલી, ડેનમાર્કની મુલાકાત લેશે. આ મિશનમાં એમજે અકબરની રાજદ્વારી સમજ મહત્વપૂર્ણ ભૂમિકા ભજવી શકે છે. એમજે અકબર આતંકવાદ અંગે પાકિસ્તાન વિરુદ્ધ અવાજ ઉઠાવતા રહ્યા છે. તેમણે ‘ઓપરેશન સિંદૂર’ અને ભારતીય સેનાની પ્રશંસા કરી હતી. તેમણે પીએમ મોદીની પણ પ્રશંસા કરી અને કહ્યું કે તમે તે શક્ય બનાવ્યું જે લોકો કલ્પના પણ કરી શકતા નથી.
હકીકતમાં, ૨૦૧૮ માં મી ટૂ વિવાદને કારણે અકબરના કરિયરને મોટો ઝટકો લાગ્યો. ઘણી ભૂતપૂર્વ મહિલા સાથીઓએ તેમના પર જાતીય સતામણીનો આરોપ લગાવ્યા બાદ તેમને મંત્રી પદ પરથી રાજીનામું આપવાની ફરજ પડી હતી. અકબરે પત્રકાર પ્રિયા રમાણી વિરુદ્ધ માનહાનિનો કેસ દાખલ કર્યો હતો, અને આ આરોપોને પાયાવિહોણા ગણાવ્યા હતા. ૨૦૨૧ માં, દિલ્હીની એક કોર્ટે રમાણીને નિર્દોષ જાહેર કર્યા, જેની સામે અકબરે દિલ્હી હાઈકોર્ટમાં અપીલ કરી. આ વિવાદથી તેમની જાહેર છબી પર અસર પડી અને તેઓ થોડા સમય માટે રાજકીય રીતે હાંસિયામાં ધકેલાઈ ગયા.
તમને જણાવી દઈએ કે ૨૨ એપ્રિલે જમ્મુ અને કાશ્મીરના પહેલગામમાં થયેલા આતંકવાદી હુમલાનો બદલો લેવા માટે, ભારતે ‘ઓપરેશન સિંદૂર’ દ્વારા પાકિસ્તાન અને પીઓકેના ૯ આતંકવાદી ઠેકાણાઓનો નાશ કર્યો હતો. હવે, ભારત આતંકવાદ પર પોતાનો વલણ રજૂ કરવા માટે ૭ સાંસદોના નેતૃત્વમાં પ્રતિનિધિમંડળો વિવિધ દેશોમાં મોકલી રહ્યું છે. જેમાં ભાજપ તરફથી રવિશંકર પ્રસાદ અને બૈજયંત પાંડા, કોંગ્રેસમાંથી શશિ થરૂર, જેડીયુમાંથી સંજય કુમાર ઝા, ડીએમકેમાંથી કનિમોઝી કરૂણાનિધિ, એનસીપી-એસપીમાંથી સુપ્રિયા સુલે અને શિવસેનાના શ્રીકાંત શિંદેનો સમાવેશ થાય છે.
એમજે અકબરે ૧૯૭૦ના દાયકામાં સન્ડે અને એશિયા જેવા પ્રકાશનોમાં પોતાના લખાણોથી હલચલ મચાવી હતી. બાદમાં, ધ ટેલિગ્રાફ અને એશિયન એજ જેવા અખબારોના સંપાદક તરીકે, તેમણે પત્રકારત્વને નવા પરિમાણો આપ્યા. તેમના પુસ્તકો, નેહરુઃ ધ મેકિંગ ઓફ ઇન્ડિયા એન્ડ કાશ્મીરઃ બિહાઇન્ડ ધ વીલ, ઇતિહાસ અને રાજકારણના ઊંડાણપૂર્વકના વિશ્લેષણ માટે જાણીતા છે.
૧૯૮૯માં, અકબરે બિહારના કિશનગંજથી કોંગ્રેસના સાંસદ તરીકે રાજકારણમાં પ્રવેશ કર્યો હતો પરંતુ ૧૯૯૧માં તેઓ આ બેઠક હારી ગયા હતા. ૨૦૧૪માં ભાજપમાં જોડાયા બાદ તેમની રાજકીય ઇનિંગ્સે એક નવો વળાંક લીધો. ૨૦૧૫માં રાજ્યસભાના સાંસદ બન્યા બાદ, તેઓ ૨૦૧૬માં મોદી સરકારમાં વિદેશ રાજ્યમંત્રી બન્યા. આ સમયગાળા દરમિયાન તેમણે વૈશ્વીક મંચ પર ભારતની રાજદ્વારી સ્થિતિને મજબૂત બનાવવામાં યોગદાન આપ્યું.
