ઉત્તરાખંડના પાવન તીર્થ ઋષિકેશ ખાતે સ્વામિનારાયણ ગુરુકુલ વિશ્વવિદ્યા પ્રતિષ્ઠાનમ્ (SGVP), અમદાવાદ દ્વારા આયોજિત ‘સત્સંગ સાધના શિબિર’ હાલમાં આધ્યાત્મિક ઉલ્લાસ સાથે ચાલી રહી છે. આ શિબિરનું સૌથી મોટું આકર્ષણ ગંગા મૈયાના રમણીય કિનારે થતું પવિત્ર સ્નાન અને ઠાકોરજીનો અભિષેક બની રહ્યું છે. શિબિરાર્થીઓની સવાર ગુલાબી ઠંડીમાં ઠંડા ગંગા પ્રવાહમાં સ્નાન કરીને દિવ્યતાથી શરૂ થાય છે. જ્યારે બપોરે, માધવપ્રિયદાસજી સ્વામી અને બાલકૃષ્ણદાસજી સ્વામીના સાનિધ્યમાં ગંગાના શીતળ જળ દ્વારા સૌપ્રથમ ઠાકોરજીનો અભિષેક કરવામાં આવે છે. અભિષેક પૂર્ણ થયા બાદ સંતો અભિષેકના પ્રસાદીરૂપ પવિત્ર જળનો સૌ ઉપર છંટકાવ કરે છે, અને ઉપસ્થિત તમામ સંતો-ભક્તો પણ ક્રમશઃ ગંગાજીના વહેતા પ્રવાહમાં ઉતરી સ્નાન કરી ધન્યતા અનુભવે છે. આ દિવ્ય ગંગાસ્નાનના અનુભવે સત્સંગ સાધના શિબિરના તમામ શિબિરાર્થીઓના હૃદયમાં ભક્તિ અને શાંતિની અવિસ્મરણીય છાપ છોડી દીધી છે.
