ઈરાન અને અમેરિકા વચ્ચે પરમાણુ વાટાઘાટો માટે સમય અને તારીખ નક્કી કરવામાં આવી છે. ઈરાનના વિદેશ પ્રધાન સૈયદ અબ્બાસ અરાઘચીએ ઇન્સ્ટાગ્રામ પર પોસ્ટ કર્યું કે અમેરિકા સાથે પરમાણુ વાટાઘાટો મસ્કતમાં યોજાવાની છે. અરાઘચીએ ઉમેર્યું “હું અમારા ઓમાની ભાઈઓનો આભારી છું જેમણે બધી જરૂરી વ્યવસ્થા કરી છે.” આ જાહેરાત ગુરુવારે કરવામાં આવી હતી. ઘણા દિવસોથી, અફવાઓ ફેલાઈ રહી હતી કે ઈરાન અને અમેરિકા વચ્ચેની પરમાણુ વાટાઘાટો સ્થાન, ફોર્મેટ અને એજન્ડા પર ઊંડા મતભેદોને કારણે રદ કરવામાં આવશે. શરૂઆતમાં, વાટાઘાટો ઈસ્તાંબુલ, તુર્કીમાં યોજવાનો પ્રસ્તાવ મૂકવામાં આવ્યો હતો, પરંતુ ઈરાને માંગ કરી હતી કે તેમને ઓમાન ખસેડવામાં આવે અને દ્વિપક્ષીય ફોર્મેટમાં પરમાણુ મુદ્દાઓ અને અમેરિકન પ્રતિબંધો સુધી મર્યાદિત રાખવામાં આવે.
અમેરિકા ઇચ્છતું હતું કે ઈરાનના મિસાઈલ કાર્યક્રમ, પ્રાદેશિક પ્રોક્સીઓ અને અન્ય મુદ્દાઓને પરમાણુ વાટાઘાટોમાં સામેલ કરવામાં આવે. ટ્રમ્પ વહીવટીતંત્રે શરૂઆતમાં ઓમાનમાં ફેરફારને નકારી કાઢ્યો હતો, પરંતુ ઓછામાં ઓછા નવ મધ્ય પૂર્વી દેશોના નેતાઓના દબાણ અને ઉચ્ચ સ્તરીય લોબિંગ પછી, વોશિંગ્ટન સંમત થયું. એક અમેરિકન અધિકારીએ જણાવ્યું હતું કે વાટાઘાટો હવે મસ્કતમાં યોજાશે, જાકે બંને પક્ષો વચ્ચે ઊંડો મતભેદ છે. ઈરાને સ્પષ્ટતા કરી કે તે ફક્ત તેના પરમાણુ કાર્યક્રમ અને પ્રતિબંધો હટાવવા અંગે જ ચર્ચા કરશે, જ્યારે અમેરિકાએ “અર્થપૂર્ણ” વાટાઘાટોની શરત રાખી હતી.
અમેરિકાના રાષ્ટ્રપતિ ડોનાલ્ડ ટ્રમ્પે ઈરાનના સર્વોચ્ચ નેતા આયાતુલ્લાહ અલી ખામેનીને ચેતવણી આપી છે કે તેમને “ખૂબ જ ચિંતિત” રહેવું જાઈએ. ઓમાન લાંબા સમયથી ઈરાન અને અમેરિકા વચ્ચે મધ્યસ્થી તરીકે ભૂમિકા ભજવી રહ્યું છે. ગયા વર્ષે મસ્કતમાં પણ આવી જ વાટાઘાટો યોજાઈ હતી. જૂન ૨૦૨૫માં ઈઝરાયલ સાથેના ૧૨ દિવસના યુદ્ધ બાદ ઈરાનના પરમાણુ સુવિધાઓ પર અમેરિકાના હુમલાઓ પછી આ બેઠક થઈ રહી છે, જેના કારણે ઈરાનના પરમાણુ કાર્યક્રમ પર ગંભીર અસર પડી હતી. વાટાઘાટોની સફળતા શંકાસ્પદ છે, કારણ કે બંને પક્ષોની માંગણીઓ વિરોધાભાસી છે. તેમ છતાં, ઓમાનનું આયોજન આશાનું કિરણ આપે છે. પ્રાદેશિક સ્થિરતા માટે આ એક મહત્વપૂર્ણ પગલું હોઈ શકે છે, પરંતુ ઊંડા અવિશ્વાસને કારણે પરિણામ અનિશ્ચિત છે.
