મણિપુરમાં બે મહિલાઓની નગ્ન પરેડ સાથે સંબંધિત વીડિયો સામે આવ્યા બાદ આ ઘટનાની ચારે બાજુથી નિંદા થઈ રહી છે. હવે સીએમ એન. બિરેન સિંહ કહે છે કે, આ વિડિયો સામે આવ્યા બાદ તરત જ, આ ઘટનાની સુઓ મોટુ સંજ્ઞાન લઈને, મણિપુર પોલીસ એક્શનમાં આવી ગઈ અને આજે સવારે પહેલી ધરપકડ કરવામાં આવી. હાલમાં, સંપૂર્ણ તપાસ ચાલી રહી છે અને અમે ખાતરી કરીશું કે તમામ ગુનેગારો સામે કડક કાર્યવાહી કરવામાં આવે, જેમાં મૃત્યુદંડની શક્યતા પર પણ વિચાર કરવામાં આવશે.
તેમણે વધુમાં કહ્યું કે ગઈકાલે રાત્રે લગભગ ૧.૩૦ વાગ્યે મુખ્ય ગુનેગારની ધરપકડ કરવામાં આવી હતી. અમે વીડિયો જાયો અને મને ખૂબ જ ખરાબ લાગ્યું, આ માનવતા વિરુદ્ધ ગુનો છે. મેં તરત જ પોલીસને ગુનેગારોની ધરપકડ કરવાનો આદેશ આપ્યો અને રાજ્ય સરકાર આરોપીઓને મૃત્યુદંડ સુનિશ્ચિત કરવાનો પ્રયાસ કરશે.
બીજી તરફ વડાપ્રધાન નરેન્દ્ર મોદીએ પણ ચોમાસુ સત્રની શરૂઆત પહેલા મણિપુરના વીડિયોને લઈને પોતાની પ્રતિક્રિયા આપી છે. તેમણે કહ્યું કે મણિપુરમાં જે બન્યું છે તે ખૂબ જ શરમજનક છે. આ સમગ્ર દેશને શરમમાં મુકવા જેવું છે. પીએમ મોદીએ કહ્યું કે હું તમામ મુખ્યમંત્રીઓને કહેવા માંગુ છું કે તેઓ તેમના રાજ્યની માતા-પુત્રીઓની સુરક્ષા અને કાયદો અને વ્યવસ્થાને મજબૂત કરવા માટે હંમેશા સજાગ રહ્યા છે. આ ઘટના અંગે હું તમને ખાતરી આપું છું કે જે લોકો દોષિત છે તેમને સખતમાં સખત સજા મળશે. મણિપુરમાં મહિલાઓ સાથે જે થયું તે કોઈપણ સંસ્કારી સમાજ માટે યોગ્ય નથી.
