૨૦૧૬માં એલસીબી પોલીસ કર્મચારી પંકજ અમરેલીયાની હત્યા કેસમાં એડિશનલ સેશન્સ કોર્ટે તમામ આરોપીઓને નિર્દોષ જાહેર કર્યા છે. ઉનામાં દલિત યુવકો પરના અત્યાચારના વિરોધમાં અમરેલીમાં દલિત સમાજ દ્વારા કાઢવામાં આવેલી રેલી દરમિયાન ફરજ પર હાજર એલસીબી કર્મચારી પંકજ અમરેલીયા પર હુમલો થતાં તેમનું મૃત્યુ થયું હતું. પોલીસે ૧૫૭ સાક્ષીઓ રજૂ કર્યા હતા. તા.૧૯-૦૬-૨૦૧૬ના રોજ એડવોકેટ નવચેતનભાઈ પી. પરમારના નેતૃત્વમાં આશરે ૧૫૦ દલિત લોકો અમરેલીમાં એકઠા થયા હતા. રેલીમાં ૭૦૦ થી ૮૦૦ લોકો જોડાયા હતા. ટોળું ગેરકાયદેસર રીતે ચિતલ રોડ તરફ વળ્યું હતું અને રસ્તા પરથી પસાર થતી બસો અને મિલકતો પર પથ્થરમારો કર્યો હતો. પરિસ્થિતિને કાબૂમાં લેવા માટે પોલીસે ટીયર ગેસનો ઉપયોગ કર્યો હતો. ચિતલ રોડ પર એલસીબી હેડ કોન્સ્ટેબલ પંકજ અમરેલીયા પર હુમલો થયો હતો, જેના કારણે તેઓ ગંભીર રીતે ઘાયલ થયા હતા અને બાદમાં મૃત્યુ પામ્યા હતા. કોર્ટે આ કેસમાં તમામ આરોપીઓને નિર્દોષ જાહેર કર્યા હતા. આરોપીઓનો પક્ષ સિનિયર એડવોકેટ ઉદયન ત્રિવેદી અને અન્ય વકીલોએ રજૂ કર્યો હતો.
