અમરેલી જિલ્લા લેઉવા પટેલ ચેરીટેબલ ટ્રસ્ટ સુરત સંચાલિત લેઉવા પટેલ ટ્રસ્ટ એમ.એસ.સી. મહિલા કોલેજે શૈક્ષણિક વર્ષ ૨૦૨૩-૨૪માં શાનદાર પરિણામો મેળવ્યા છે. કોલેજની ચાર વિદ્યાર્થિનીઓએ સૌરાષ્ટ્ર યુનિવર્સિટીના એમ.એસ.સી.(બીટી)ના ટોપ ટેનમાં સ્થાન પ્રાપ્ત કરીને સંસ્થાનું ગૌરવ વધાર્યું છે. ચક્કરગઢ રોડ સ્થિત શાંતાબેન હરીભાઈ ગજેરા શૈક્ષણિક સંકુલ (ગર્લ્સ) ખાતે કાર્યરત આ કોલેજની વિદ્યાર્થિની આદેસરા ધ્વનિ એસ. ૮૩.૫૦ ટકા સાથે યુનિવર્સિટીમાં પ્રથમ ક્રમે રહી છે. જ્યારે ગોળકીયા જહાન્વી એમ. ૮૩ ટકા સાથે બીજા ક્રમે, પટેલ માર્ગી એન. ૭૬.૨૯ ટકા સાથે ચોથા ક્રમે અને વઘાસીયા નિરાલી કે. ૭૫.૫૦ ટકા સાથે છઠ્ઠા ક્રમે રહી છે. સૌરાષ્ટ્ર યુનિવર્સિટીના એમ.એસ.સી.(બીટી)ના એગ્રીગેટ પરિણામમાં કોલેજની ચાર વિદ્યાર્થિનીઓએ ટોપ ટેનમાં સ્થાન મેળવવા બદલ સંકુલ પરિવારે તમામ રેન્કર વિદ્યાર્થિનીઓને હૃદયપૂર્વક અભિનંદન પાઠવ્યા છે.
