અમરેલીના નાના આંકડીયા ગામમાં આવેલી શ્રી એચ. આર. ગારડી હાઇસ્કૂલ ખાતે રંગોત્સવ સેલિબ્રેશન કાર્યક્રમ-મુંબઈ અંતર્ગત વિવિધ કલાત્મક સ્પર્ધાઓનું શાનદાર આયોજન કરવામાં આવ્યું હતું. આ કાર્યક્રમ અંતર્ગત યોજાયેલી ડ્રોઇંગ, કલરિંગ અને હેન્ડ રાઇટિંગ સ્પર્ધાઓના પરિણામો ઉત્સાહભેર જાહેર કરવામાં આવ્યા છે. આ વિશેષ સ્પર્ધામાં શાળાના વિદ્યાર્થીઓએ પોતાની અદ્ભુત કલાત્મક કુશળતા અને શ્રેષ્ઠ સર્જનાત્મકતાનું પ્રદર્શન કરીને શાળાનું નામ રોશન કર્યું છે.આ આંતરરાષ્ટ્રીય સ્તરની સ્પર્ધામાં શાળાની પ્રતિભાશાળી વિદ્યાર્થિની એન્જલ ભરતભાઈ વાગડીયાએ બીજો નંબર પ્રાપ્ત કરીને અનોખી સિદ્ધિ મેળવી છે, જેના સન્માનરૂપે તેને બ્લુટૂથ સાઉન્ડ બાર અને આકર્ષક ટ્રોફી એનાયત કરવામાં આવ્યા છે. આ ઉપરાંત અન્ય તેજસ્વી વિદ્યાર્થિની ધ્રુવી નિરંજનભાઈ સરપદડિયાએ પોતાની કળાના દમ પર પ્રતિષ્ઠિત આર્ટ મિસ્ટ્રો એવોર્ડ અને ટ્રોફી જીતી લીધા છે. શાળાના કુલ નવ સ્પર્ધકોમાંથી આ બે મુખ્ય વિજેતા વિદ્યાર્થીનીઓ સિવાય અન્ય પાંચ બાળકોને તેમની ઉત્કૃષ્ટ મહેનત બદલ મેડલ આપીને પ્રોત્સાહિત કરાયા હતા તથા બાકી રહેલા બે બાળકોને વિશેષ સરપ્રાઇઝ ગિફ્ટ આપવામાં આવી હતી.
