‘રાગિની એમએમએસ રિટર્ન્સ’ અને ‘પ્યાર કા પંચનામા’ જેવી ફિલ્મોમાં અભિનય માટે પ્રખ્યાત કરિશ્મા શર્મા તાજેતરમાં એક ગંભીર અકસ્માતનો ભોગ બની હતી. મુંબઈમાં ચાલતી ટ્રેનમાંથી કૂદીને તેણીને ગંભીર ઈજાઓ થઈ હતી અને હાલમાં તેણી હોસ્પિટલમાં દાખલ છે. આ અકસ્માત ત્યારે થયો જ્યારે તે શૂટિંગ માટે ચર્ચગેટ સ્ટેશન તરફ જઈ રહી હતી. અભિનેત્રી હાલમાં ખૂબ પીડામાં છે અને ઊંડા ઘામાંથી સ્વસ્થ થઈ રહી છે. કરિશ્માએ પોતે તેના ઇન્સ્ટાગ્રામ હેન્ડલ પર આ ઘટનાની માહિતી શેર કરી છે. કરિશ્માએ જણાવ્યું કે તે અકસ્માતનો ભોગ કેવી રીતે બની અને હવે તેની સાથે શું થયું છે.
કરિશ્માએ તેની ઇન્સ્ટાગ્રામ સ્ટોરી પર આ પીડાદાયક ઘટના વિશે માહિતી આપી. તેણે જણાવ્યું કે શૂટિંગના સંદર્ભમાં તેણી સાડી પહેરી હતી અને ટ્રેનમાં ચઢતાની સાથે જ તેની ગતિ અચાનક વધી ગઈ. આ સમય દરમિયાન, તેણે જાયું કે તેના મિત્રો ટ્રેનમાં ચઢી શકતા નથી. ગભરાઈને, તેણીએ ચાલતી ટ્રેનમાંથી કૂદી પડવાનું નક્કી કર્યું, જેના કારણે તે પીઠના બળે જમીન પર પડી ગઈ. કરિશ્માએ જણાવ્યું કે આ અકસ્માતમાં તેને માથામાં ઊંડી ઈજા થઈ છે, પીઠમાં દુખાવો થયો છે અને શરીર પર ઘણી જગ્યાએ ઈજાના નિશાન છે. માથામાં થયેલી ઈજાની ગંભીરતાને ધ્યાનમાં રાખીને ડોક્ટરોએ એમઆરઆઇ કરાવવાની સલાહ આપી છે અને હાલ તેને નિરીક્ષણ હેઠળ રાખવામાં આવી છે.
કરિશ્માએ પોતાની પોસ્ટમાં લખ્યું, ‘ગઈકાલે, ચર્ચગેટ પર શૂટિંગ માટે જતી વખતે, મેં સાડી પહેરીને લોકલ ટ્રેનમાં જવાનું નક્કી કર્યું. ટ્રેન શરૂ થતાંની સાથે જ તેની ગતિ વધી ગઈ અને મેં જોયું કે મારા મિત્રો ટ્રેનમાં ચઢી શકતા નથી. ડરના કારણે, હું કૂદી પડી અને મારી પીઠ પર પડી ગઈ. માથામાં સોજા આવી ગયો છે અને પીઠમાં ભારે દુખાવો થઈ રહ્યો છે. ડોક્ટરોએ એમઆરઆઇ કરાવવાની સલાહ આપી છે. હું હાલમાં હોસ્પિટલમાં છું. કૃપા કરીને મારા જલ્દી સ્વસ્થ થવા માટે પ્રાર્થના કરો.’
તેના એક નજીકના મિત્રએ હોસ્પિટલથી એક ભાવનાત્મક સંદેશ શેર કર્યો અને જણાવ્યું કે અકસ્માત પછી કરિશ્મા બેભાન હાલતમાં મળી આવી હતી. મિત્રએ લખ્યું, ‘મને વિશ્વાસ નથી થઈ રહ્યો કે કરિશ્મા સાથે આવું કંઈક થયું છે. તે બેભાન હતી અને અમે તેને જમીન પર પડેલી જોઈ. તેને તાત્કાલિક હોસ્પિટલ લઈ જવામાં આવી. ડોક્ટરો તેની સ્થિતિ પર નજર રાખી રહ્યા છે. જલ્દી સ્વસ્થ થાઓ, કરિશ્મા.’
કામના મોરચે, કરિશ્મા શર્મા ‘ફસાતે ફસાતે’, ‘સુપર ૩૦’, ‘એક વિલન રિટર્ન્સ’ જેવી ફિલ્મોમાં જોવા મળી છે. આ ઉપરાંત, તે ‘પવિત્ર રિશ્તા’, ‘યે હૈ મોહબ્બતેં’ અને ‘પ્યાર તુને ક્યા કિયા’ જેવા ટીવી શોનો પણ ભાગ રહી છે. આ ઘટનાએ ફરી એકવાર મુંબઈ લોકલ ટ્રેનની મુસાફરી દરમિયાન સલામતી અને જાગૃતિની જરૂરિયાતને ઉજાગર કરી છે. અમે કરિશ્માના ઝડપથી સ્વસ્થ થવાની ઇચ્છા રાખીએ છીએ.
